web counter
LEXO PA REKLAMA!

SHKARKO APP

App Store
Google Play

E fundit!

x

"Fjalori i Madh i Gjuhës Shqipe"/ Prezantohet në Korçë vepra madhore e leksikografisë shqiptare

12 Maj 2026, 10:00, Aktualitet CNA

Në Universitetin “Fan Noli” të Korçës u prezantua Fjalori i Madh i Gjuhës Shqipe 2026, një nga veprat më të rëndësishme të leksikografisë shqiptare, që sipas studiuesve përfaqëson një arritje madhore për gjuhën dhe kulturën shqiptare. Aktiviteti mblodhi përfaqësues të Akademisë së Shkencave të Shqipërisë, pedagogë, studiues dhe studentë, në një veprimtari të dedikuar rëndësisë së dokumentimit dhe pasurimit të gjuhës shqipe.

Duke çelur aktivitetin, moderatori i veprimtarisë, Dr. Olger Brame, e cilësoi këtë moment si një ngjarje me peshë të veçantë për kulturën kombëtare.

“Është një nder i veçantë dhe një privilegj që sot jemi mbledhur për një ngjarje që shënon një moment kthese në historinë e kulturës sonë kombëtare. Sot, në Universitetin e Korçës, do të paraqesim Fjalorin e Madh të Gjuhës Shqipe, një vepër madhore e leksikografisë shqiptare. Gjuha është atdheu ynë i parë dhe ky fjalor i madh siguron që ky atdhe të mbetet i pathyeshëm dhe i pasur për brezat që vijnë”, u shpreh Brame.

Në fjalën e tij përshëndetëse, rektori i Universitetit “Fan Noli”, Lorenc Ekonomi, e cilësoi fjalorin si një dëshmi të fuqisë shprehëse të gjuhës shqipe dhe një monument kulturor të kombit shqiptar. Ai theksoi rëndësinë e ruajtjes dhe pasurimit të gjuhës si një detyrë të përhershme kombëtare dhe akademike.

“Kam kënaqësinë dhe privilegjin e veçantë t’ju drejtohem në këtë aktivitet me rëndësi të spikatur akademike dhe kulturore. Gjuha është ndër simbolet më të fuqishme të identitetit të një kombi. Përmes saj ruhen kujtesa historike, trashëgimia shpirtërore, kultura dhe vetëdija jonë kombëtare. Fjalori i Madh i Gjuhës Shqipe përfaqëson jo vetëm një arritje shkencore të jashtëzakonshme, por edhe një dëshmi të përkushtimit të studiuesve shqiptarë për ta pasqyruar në mënyrë sa më të plotë pasurinë leksikore të shqipes”, tha Ekonomi.

Në emër të Akademisë së Shkencave të Shqipërisë, sekretarja shkencore, Anila Hoda, e cilësoi këtë vepër një vlerë kombëtare që u shërben shqiptarëve kudo në botë dhe studiuesve të gjuhës shqipe. Ajo vlerësoi punën shumëvjeçare të grupit të studiuesve dhe theksoi se sugjerimet profesionale do të ndihmojnë në përmirësimin e mëtejshëm të saj.

“Është kënaqësi e veçantë për mua sot që, në emër të Kryesisë së Akademisë së Shkencave, të jem pjesë e këtij aktiviteti ku prezantohet një nga veprat më madhore: Fjalori i Madh i Gjuhës Shqipe. Mendoj që është një vlerë jo vetëm kombëtare, por një vlerë për të gjithë shqiptarët kudo që janë sot në botë dhe për të gjithë studiuesit e gjuhës shqipe. Është jo vetëm një vepër me vlerë shkencore, por edhe një monument kulture. Duhet të vlerësojmë punën e madhe dhe të përkushtuar të grupit të studiuesve që kanë kontribuuar në hartimin e saj”, tha Hoda.

Pjesëmarrësit e cilësuan këtë projekt si një pasuri të përbashkët kombëtare, ndërsa theksuan se hedhja e tij në platformë digjitale e bën më të aksesueshëm për studiuesit, pedagogët, studentët dhe të gjithë përdoruesit e gjuhës shqipe. Fjalori i Madh i Gjuhës Shqipe synon të shërbejë si instrument themelor për dokumentimin dhe pasqyrimin e pasurisë leksikore të shqipes bashkëkohore, duke mbetur një referencë e rëndësishme për brezat që do të vijnë. /CNA





Lajmet e fundit nga