E fundit!

10:38 Kulturë

Ndahet nga jeta mjeshtri i humorit, Todi Llupi

Ndahet nga jeta në moshën 78-vjeçare mjeshtri i humorit To...

Fitër Bajrami/ Qindra besimtarë korçarë falin namazin në xhaminë Iljaz Bej Mirahori

30 Mars 2025, 11:26, Aktualitet CNA

Fitër Bajrami/ Qindra besimtarë korçarë falin namazin

Pas përfundimit të muajit të shenjtë të Ramazanit, qindra besimtarë myslimanë në Korçë u mblodhën mëngjesin e së dielës për të falur namazin e Fitër Bajramit.

Ceremonia u zhvillua në sheshin e xhamisë Iljaz Bej Mirahori, duke nisur rreth orës 07:30. Ritin e faljes e udhëhoqi myftiu Ledian Cikalleshi, i cili përcolli urimet e tij për këtë ditë të shenjtë, duke dëshiruar paqe dhe begati për të gjithë besimtarët.

"Sot është një festë e madhe për myslimanët e vendit tonë, mbarë myslimanët e qytetit të Korçës e mbarë myslimanët në gjithë botën. Sot kurorëzohet sakrifica e tyre 30 ditore e agjërimit. Të gjithë myslimanët, për 30 ditë me rradhë, agjëruan, u përpoqën të kryenin vepra të mira, qëndruan nga mëngjesi deri në darkë larg ushqimit, pijes e çdo lloj kënaqësie tjetër, vetëm për të fituar kënaqësinë e zotit. Sot ata kurorëzojnë shpërblimin, kurorëzojnë sakrificën dhe festojnë festën e Fitër Bajramit. Uroj që Fitër Bajrami ti ketë gjetur sa më mirë të gjithë shqiptarët, të gjithë besimtarët myslimanë dhe të sjellë mirësi, paqe në familjet e tyre. Gëzuar për shumë vjet Fitër Bajramin", u shpreh myftiu Ledian Cikalleshi.

Besimtarët myslimanë kanë treguar se Fitër Bajrami është dita më e veçantë për ta, pas agjërimit të muajit të Ramazanit. Ata e konsiderojnë si muaj pajtimi dhe si gëzim që vjen pas vështirësisë. Ndër të tjera, besimtarët shkëmbyen urime me njëri-tjetrin, duke shpresuar për mbarësi dhe harmoni në familjet e tyre.

"Fitër Bajrami simbolizon një vështirësi të madhe e një detyrë të madhe si muaj pajtimi për gjithë njerëzit e besimtarët myslimanë. Unë me këtë rast uroj të gjithë besimtarët gëzuar, lumturi, paqe në familjet e tyre. Nuk ishte mundësia të agjëroja këtë vit. Do përgatisim diçka të ëmbël, kadaif, bakllava", tha një besimtar

"Gëzuar, për shumë vjet gëzuar dhe paqe në gjithë botën paçim. Po, agjërova. Agjërimi është për të gjithë njerëzit", u shpreh një tjetër besimtar.

Në prononcimet e tyre për media, besimtarët kanë uruar Fitër Bajramin dhe janë lutur që Zoti të pranojë agjerimin dhe çdo vepër të mirë.

"Zoti na i ka dhënë këtë gëzim, që ne besimtarët myslimanë pas një vështirësie, na ka dhënë lehtësimin që është festa e Fitër Bajramit. Besimtari nuk është vetëm për t’u falur, por edhe për të ndihmuar. Ju uroj të gjithë besimtarëve e shqiptarëve, gëzuar Fitër Bajramin. Zoti ua pranoftë çdo vepër të mirë dhe u dhëntë të gjithëve hajër", uroi një besimtar.

"Unë vetë nuk kam agjëruar, por gruaja e vajza agjëruan. Unë jam besimtar, vij shpesh herë. Kjo është ditë vërtet e veçantë, më bëhet qëjfi kur shikoj kaq njerëz e kaq shumë të rinj që vijnë këtu. Ne jemi pesë vëllezër e motra dhe bëhemi bashkë për të festuar, e kemi si traditë në familjen tonë. Uroj të gjithë besimtarët që zoti tju sjellë vetëm mbarësi e lumturi", u shpreh një besimtar tjetër.

Kjo ditë e shënuar solli gëzim dhe solidaritet mes besimtarëve, të cilët e festuan me zemër të hapur dhe dashuri për njëri-tjetrin. Fitër Bajrami mbetet një moment reflektimi dhe mirënjohjeje për të gjitha bekimet e jetës./ CNA