web counter
LEXO PA REKLAMA!

SHKARKO APP

App Store
Google Play

E fundit!

x

Fisnik Qosja sqaron pjesëmarrjen në takimin me Delegacionin e BE-së: Mos përdorni emrin dhe pozicionin tim përfaqësues

7 Mars 2026, 14:52, Aktualitet CNA

Fisnik Qosja sqaron pjesëmarrjen në takimin me Delegacionin e

Kryetari i Bashkisë së Kavajës, Fisnik Qosja, ka reaguar pas publikimeve në rrjetet sociale lidhur me një takim të zhvilluar me përfaqësues të Delegacionit të Bashkimit Europian në Shqipëri, duke sqaruar rolin e tij në këtë aktivitet.

Përmes një deklarate, Qosja theksoi se në takim ka marrë pjesë në cilësinë e kryetarit të Bashkisë Kavajë dhe jo si përfaqësues i Shoqatës Kombëtare të Bashkive.

Ai sqaroi gjithashtu se nuk është dhe nuk ka qenë bashkëkryetar i kësaj shoqate nga mazhoranca. Sipas tij, aktualisht mban detyrën e kryetarit të Shoqatës së të Zgjedhurve Vendorë, që përfaqëson të zgjedhurit vendorë të krahut opozitar.

Qosja theksoi se këtë grupim do ta përfaqësojë në çdo takim, konferencë apo forum kombëtar dhe ndërkombëtar, përfshirë aktivitetet e Kongresit të Autoriteteve Lokale dhe Rajonale të Këshillit të Europës në Strasburg, Bruksel dhe në struktura të tjera ndërkombëtare.

Në reagimin e tij, ai u bëri thirrje organizatave dhe projekteve që të mos përdorin apo interpretojnë në mënyrë të pasaktë emrin dhe pozicionin e tij përfaqësues.

Në përfundim, Qosja theksoi se në çdo aktivitet publik përfaqëson vetëm detyrën e tij si kryetar i Bashkisë Kavajë dhe si President i Shoqatës së të Zgjedhurve Vendorë.

“Lidhur me lajmin e publikuar në media sociale për takimin e zhvilluar me përfaqësues të Delegacionit të Bashkimit Europian në Shqipëri, duke marrë si referencë njoftimin e bërë publik, unë, Fisnik Qosja, deklaroj se:

1. Në këtë takim kam qenë, së pari, në cilësinë e kryetarit të Bashkisë Kavajë.

2. Nuk kam qenë dhe nuk jam bashkëkryetar i Shoqatës Kombëtare të Bashkive nga mazhoranca.

3. Unë jam President i Shoqatës së të Zgjedhurve Vendorë, që përfaqëson të zgjedhurit vendorë të krahut opozitar, dhe këtë grupim kam përfaqësuar dhe do ta përfaqësoj në çdo takim, konferencë apo forum kombëtar, ndërkombëtar, përfshirë edhe Kongresin e Autoriteteve Lokale dhe Rajonale të Këshillit të Europës, në Strasburg, në Bruksel apo në organizata dhe struktura të tjera ombrelle.

4. Ftoj çdo organizatë apo projekt që të mos përdorë apo interpretojë në mënyrë të pasaktë emrin dhe pozicionin tim përfaqësues.

5. Mbështes plotësisht qëndrimet e Asamblesë së Shoqatës së të Zgjedhurve Vendorë mbi identitetin, qëllimet, veprimtarinë dhe bashkëpunimin institucional për forcimin e decentralizimit dhe për procesin e integrimit të Shqipërisë në Bashkimin Europian.

Shoqata e të Zgjedhurve Vendorë dhe anëtarët e saj mbrojnë me vendosmëri identitetin, qëndrimet dhe kauzat që përfaqësojnë. Ne jemi një organizim i pavarur institucional dhe do të vazhdojmë të përfaqësojmë zërin tonë në çdo forum kombëtar dhe ndërkombëtar.

Për këtë arsye, sqaroj qartë se nuk jam pjesë dhe nuk përfaqësoj Shoqatën Kombëtare të Bashkive, ndërsa në çdo aktivitet publik përfaqësoj vetëm detyrën time si kryetar i Bashkisë Kavajë dhe si President i Shoqatës së të Zgjedhurve Vendorë”, tha Qosja./ CNA





Lajmet e fundit nga