Çështja e aeroportit të Vlorës/ Ola Xama ngre pikëpyetjet: Pse morën në kontratë kompaninë turke

13 Nëntor 2025, 15:46, Aktualitet CNA

Çështja e aeroportit të Vlorës/ Ola Xama ngre

Gazetarja Ola Xama ka folur për çështjen e aeroportit të Vlorës duke ngritur pikëpyetjet pas intervistës së biznesmenit Valon Ademi në "Opinion".

Përmes një reagimi në rrjetet sociale, Xama thekson se akuzat që bëhen për tentativa se kontratën kërkon ta marrë një kompani ruse janë të pabesueshme.

Gazetarja nënvizon se biznesmeni duhet të sqarojë se çfarë e pengon Behgjet Pacollin që të shesë kompaninë Mabco te një firmë kineze, ruse apo dhe Koresë së Jugut.

Më tej, Xama thotë se kriteret ku shteti jep miratimin për shitjen e aksioneve në një kontratë janë shumë të qarta dhe kushti lidhet me aftësinë e kompanisë dhe jo me pronarin.

Sipas gazetares, projekti është rrezikuar te pika e operimit për shkak të largimit të firmës turke YDA me konsensusin e dy ortakëve (Ademi dhe Pacolli) dhe miratimin e ministres së Infrastrukturës dhe Energjisë.

Gazetarja thekson se dy aksionerët duhet të sqarojnë përse morën në kontratë kompaninë turke.

“Akuzat që bëhen për tentativa se kontratën koncesionare kërkon ta marrë një kompani ruse janë të pabesueshme. Z. Ademi duhet të sqarojë se çfarë e pengon sot z.Pacolli që të shesë kompaninë Mabco te një firmë kineze, ruse apo qoftë e Koresë së Jugut? Asgjë. Përse duhet ta bëjë këtë manovër përmes marrjes së huasë dhe jo drejtpërdrejt kur nuk e pengon asgjë?

Kriteret ku shteti jep miratimin për shitjen e aksioneve në një kontratë koncesionare janë shumë të qarta: duhet që kompania të ketë të njëjtën përvojë teknike dhe kapacitet financiar me atë që largohet që të mos rrezikojë zbatimin e projektit. Pra kushti lidhet me aftësinë e saj dhe jo me pronarin.

Dhe projekti është rrezikuar te pika e operimit për shkak të largimit të firmës turke YDA me konsensusin e dy ortakëve (Ademi dhe Pacolli) dhe miratimin e Ministres së Infrastrukturës dhe Energjisë!

Këtë duhet të sqarojnë të dy aksionerët e Aeroportit të Vlorës: përse morrën në kontratë kompaninë turke? Kush i këshilloi ta marrin dhe si ka mundësi që përpara se të fitohet një kontratë publike duhet të takohet ministri i Infrastrukturës dhe Energjisë?

Te intervista e djeshme e Valon Ademit nuk kuptova dy gjëra:

1. Ademi pretendon 47% të aksioneve në bazë të një vlere investimi 25 milion euro të kryer nga fimra e tij 2A Group, ndërsa vlera e investuar gjithsej në këtë kontratë (sipas asaj që tha) është 100 milion euro. Atëherë përse nuk pretendon 25% të aksioneve por 47%?

2. Faktin që z.Pacolli është i lidhur me Kremlinin e zbuloi së fundi apo historia e tij që ka patur biznese në vendet e ish-Bashkimit Sovjetik njihet nga të gjithë përfshirë dhe nga qeveria shqiptare?”, shkruan gazetarja Ola Xama./ CNA