Do të vrasin Lulzim Bashën/ Zbardhen faktet, si u alarmua policia?

19 Shtator 2022, 13:22, Aktualitet CNA

Në vitin 2017, autoritetet shqiptare janë vënë në alarm, pas marrjes së një informacioni për një plan për eliminimin fizik të Lulzim Bashës, në atë kohë, kryetar i Partisë Demokratike.

Sot janë zbuluar të dhëna nga detajet hetimore.

Sipas dokumenteve që janë zbardhur nga e-mailet e Gledis Nanos dhe që u publikuan nga hakerat, hetimi ka nisur në prill të vitit 2017, pas një kërkese nga njësia e Antiterrorit.

Sipas dokumenteve gjithçka ka nisur pas një interviste të Presidentit të ndjerë Bujar Nishani, i cili shprehej se ka aktorë që duan destabilizimin e vendit.

Pas kësaj deklarate është forcuar siguria e Lulzim Bashës, gjë që është vërejtur në daljet e tij publike.

Policia ka skeduar dy persona, si atentatorë të mundshëm për eliminimin e Lulzim Bashës.

Njëri identifikohet me inicialet A.M. dhe në dokument thuhet se ka dijeni për një atentat të mundshëm ndaj kryetarit të opozitës me qëllim destabilizimin e vendit.

Prokuroria ka këqyrur sistemin TIMS nga ku ka rezultuar se A.M., A.Y. dhe F.G., kishin hyrë në Shqipëri përpara datës për të cilën zhvillohen hetimet, njëri në vitin 2014, i dyti në vitin 2016 dhe i treti në vitin 2010.

Janë administruar përgjimet e telekomunikacioneve, theksohet më tej, sikurse edhe përgjigjet nga Interpoli.

Në fund të 2019 nga kqyrjet e telefonit të A.Y., i pyetur për shkaqet e udhëtimit drejt Shqipërisë i zbulohen 29 numra telefoni.

Në 2019 ai ka komunikuar me një numër telefoni në Monako, dhe me numra të tjerë të familjes që tregojnë se ai ishte i interesuar për të udhëtuar në Angli. Gjatë këtij viti ai vjen në Shqipëri dhe konkretisht në Durrës dhe përmes "Viber"-it komunikon në serbisht e anglisht për të garantuar largimin drejt Britanisë së Madhe.

Nga kqyrjet evidentohen edhe përgjime të tjera në "G-mail" dhe "Facebook", nga të cilat prokuroria thotë se nuk siguroi të dhëna konkrete.

Ky shtetas diskuton për probleme personale, përmend akuza. Hetuesit theksojnë se nuk janë gjetur lidhje të këtyre personave me të tjerë që të krijojnë bindjen për kryerjen e veprave të dyshuara dhe nuk janë konstatuar veprime që të vënë në rrezik jetën e kryetarit të opozitës.

Ky vendim i pushimit të hetimeve ju njoftua në mes të javës edhe Antiterrorit, ndërkohë që gjykata do të vendosë vulën nëse duhet apo jo të pushohet hetimi.

Tre shtetasit e dyshuar:

A.M. i datëlindjes 20.12.1959, banues në Rr. ”Pançe Poposki”, Gostivar. Prej vitit 1998 është punonjës i policisë së Gostivarit në sektorin për krim dhe teknik/ Policisë Shkencore. Është person i përfshirë në veprimtari antiligjore, trafik droge dhe njihet si një person, i cili është i gatshëm të bëjë gjithçka për para.

A.Y. i datëlindjes 27.08.1981 nga Prishtina, i njohur me nofkën “Japani”. Praktikant radikal i fesë islame, ish-luftëtar xhihadist në Siri dhe lidhje me elementë radikalë që kanë luftuar në Siri. Njihet si një person me rrezikshmëri të lartë. Është arrestuar në janar 2016, pasi është gjetur në rrugën e manastirit të Deçanit me uniformë dhe armë, së bashku me shtetasin Alban Kelmendi nga Ferizaj, Kujtim Kurti nga Gjakova dhe Kushtrim Rama, nga Rashkoci i Gjakovës.

F.G. i datëlindjes 21.06.1965. I dyshuar si i përfshirë në atentatin e vitit 2010 ndaj A.M. nga Durrësi, për shkak të konkurrencës lidhur me lojërat e fatit në Ferizaj, Kosovë./CNA.al