Deklaratat e Ramës për drejtësinë/ Klodian Tomorri: Lojë politike për të fituar kohë

26 Shkurt 2026, 18:51, Aktualitet CNA

Deklaratat e Ramës për drejtësinë/ Klodian Tomorri:

Qeveria shqiptare po përballet me një situatë të tensionuar për shkak të hetimeve të SPAK, ndërsa qëndrimet e kryeministrit Edi Rama duket se tregojnë një përpjekje për të zgjatur kohën dhe për të menaxhuar pasojat politike.

Sipas gazetarit Klodian Tomorri, strategjia e Ramës nuk është një refuzim i drejtpërdrejtë i drejtësisë, por një lojë politike që synon të shpëtojë kohë, duke ndërthurur masa kundër institucioneve dhe tërheqje taktike në momentet kritike.

Gazetari nënvizon se faktorët ndërkombëtarë, veçanërisht Bashkimi Europian, kanë bërë të qartë se çdo tentativë për të kufizuar veprimtarinë e drejtësisë do të ketë pasoja. Rasti më i dukshëm është ai i zëvendëskryeministres, ku imuniteti i saj aktual në parlament është një pengesë që Rama po përpiqet të menaxhojë me taktika të ndryshme.

Tomorri paralajmëron se, pavarësisht lëvizjeve të momentit, kryeministri do të duhet të përballet me realitetin e hetimeve dhe me kostot politike që rrjedhin nga ky proces.

“Shiko, në fakt, ajo që po bën kryeministri mua më duket si një përpëlitje, për të shtyrë akoma më shumë atë që është e pashmangshme për atë. Pra, në një moment të caktuar ai duhet të marri një vendim. Do t'i dalë frontalisht SPAK-ut dhe drejtësisë dhe do të krijojë bunkerin e paprekshmërisë për për veten dhe ministrat e vet, apo do të lërë drejtësinë të bëjë punën e saj. Deri më tani nga shpërthimi i çështjes së Ballukut, pra dosjes së Ballukut dhe asaj të Akshi-t, ajo që ka bërë kryeministri është që ka fituar kohë, është përpëlitur duke fituar kohë. Pra, duket si një lojë që herë nis ndonjë nismë kundër institucioneve të drejtësisë, pastaj më vonë korrekton ato që ka nisur. Pra, unë e shoh që zoti Rama po kërkon të fitojë ende kohë.

Ai e ka shumë të qartë, pavarësisht situatës ku është Bashkimi Europian, pavarësisht rrymave të ndryshme që mund të ketë brenda Bashkimit Europian, pavarësisht lobimeve dhe miqësive personale që mund të ketë zoti Rama brenda strukturave të Bashkimit Europian, ai e ka shumë të qartë që bërja bllok, politikisht ndaj drejtësisë, pra, vendosja e kufijve për drejtësinë, nuk mund të kalojë kollaj në Bruksel dhe nuk mund të kalojë pa pasoja për zotin Rama.

SPAK-u po kërkon ta çojë në fund procesin e nisur. Por, në rastin konkret, dosja Balluku është në parlament tek imuniteti. Pra, ajo që them, ky po mundohet ta shtyjë sa më shumë, por e di, pavarësisht këtyre përpëlitjeve, që në një moment do të duhet të përballet. A ka zoti Rama kurajon të marrë përsipër që të hapë luftë frontale me drejtësinë, t'i vendosë asaj kufij? Mua m'u duk thjesht përpëlitje. Pra, përpëlitje që kërkon të fitojë akoma më shumë kohë. A e ka këtë kurajo pra për t'i vënë gardhin drejtësisë dhe pastaj të mbajë përsipër kostot politike që do t'i vijnë, që sigurisht, mesazhet që i janë dhënë në takimet me ndërkombëtarët, pra me grupin e deputetëve nga Parlamenti Europian që ishte në Shqipëri, janë që drejtësia nuk preket, ajo duhet të bëjë punën e saj. Imuniteti i zëvendëskryeministres duhet të shqyrtohet me shpejtësi në parlament dhe ky mesazh që po t'i japim këtu nuk do të jetë edhe për shumë kohë brenda kësaj zyre, thjesht dhe vetëm brenda kësaj zyre. Pra, që do të ketë qëndrime të forta publike nga Bashkimi Europian, nga Komisioni Europian e kështu me radhë.

Dhe ato lojëra apo, po themi, ato lojëra fjalësh që bën kryeministri, që këtu nuk është akoma koha e dorëheqjeve morale, sepse jemi në fazë revolucionare të drejtësisë, apo projektet për të dhënë imunitet ligjor anëtarëve të qeverisë, sigurisht që janë një çmenduri, pasi nuk kanë se si të kalojnë, po themi, traun e Europës, për një arsye shumë të thjeshtë. Kur Bashkimi Europian nuk e njeh instrumentin e imunitetit për zyrtarët e vet, për deputetët e vet. Ju e keni parë se çfarë ndodh, se si arrestohen eurodeputetë në mes të parlamentit Europian, pa asnjë kërkesë për imunitet askund. Pra, ti po kërkon të anëtarësohesh në Bashkimin Europian, po si mund të të njohë ty Europa një privilegj që nuk ia njeh vetes? Pra, kjo është ajo, paradoksi në gjithë këtë”, tha Tomorri./ CNA