Dalja e tezave para provimit të maturës/ Specialisti Stefa, thirrje autoriteteve: Duhen masa të rrepta

8 Qershor 2022, 19:06, Aktualitet CNA

Dalja e tezave para provimit të maturës/ Specialisti Stefa, thirrje

Profesori dhe specialisti i arsimit, Ardi Stefa

Profesori dhe specialisti i arsimit, Ardi Stefa, ka folur sot për CNA.al, lidhur me publikimin e tezave para fillimit të provimit të maturës.

Stefa tha se fenomene të tilla ka pasur dhe do të ketë gjithmonë, por theksoi se do të ishte më shqetësuese nëse teza do të dilte nga organet që e hartojnë.

Specialisti deklaroi se publikimi i tezës do të delegjitimonte dhe zhvlerësonte krejtësisht të gjithë maturën dhe do të hidhte në erë përpjekjet e nxënësve.

“Fenomene të tilla ka pasur dhe unë mendoj se gjithmonë do të ketë, është e pashmangshme një gjë e tillë sepse dikush mund të kalojë një telefon apo të kalojë një orë apo një palë syze që kanë kamera të instaluara në skeletin e tyre, etj., etj. dhe teza të dalë. E rëndësishme është që teza të mos dalë nga organet, të cilat e hartojnë tezën.

Pra, në qoftë se do të kishim ndonjë shitblerje të tezës, atëherë kjo do të ishte shqetësuese dhe do të ishte një fenomen penalizues, i dënuar nga ligji. Por në momentin që ndonjë nxënës në ndonjë qytet, në Tiranë, në Vorë, në Kurbin, ku di unë, në Mirditë, Topojë apo edhe Sarandë, dikush ka kaluar një telefon që e fotografon dhe publikohet teza, atëherë po, ky do të ishte një fenomen shqetësues, por nuk ka të bëjë me institucionet që hartojnë tezën. Kjo ka të bëjë me mënyrën si monitorohen dhe si administrohen provimet, se si janë masat e sigurisë, etj., etj.

Unë uroj që të mos ketë dalje të tezës, as përpara, as pas dhe as gjatë provimit, do të ishte shumë e gabuar. Është një gjë e papranueshme, është një gjë, e cila duhet në njëfarë mënyre të ketë dënime sipas ligjeve në fuqi dhe është një proces, i cili nëse do të ndodhë, do të delegjitimojë dhe do të zhvlerësojë krejtësisht të gjithë maturën dhe do të hedhë në erë përpjekjet 3-vjeçare të nxënësve apo përpjekjet 12-vjeçare të një kategorie nxënësish që punojnë. Unë uroj që të mos ketë të tilla, por duhet që të ketë masa të rrepta, duke respektuar pedagogjinë dhe duke respektuar edhe humanizmin”, u shpreh ai për CNA.al

I pyetur për masat e ndërmarra nga autoritetet, profesori kërkoi të mos paragjykohen, ndërsa theksoi se ato duhet të jenë të rrepta.

“Vit për vit është thënë që kemi marrë masat më të rrepta dhe vit për vit kanë dalë tezat. Nuk duhet të paragjykojmë, duhet të rrimë e të presim. Për mua masat duhen marrë, duhet të jenë të rrepta në mënyrë që provimi të zhvillohet në një mënyrë normale dhe brenda të gjithë kuadratit ligjor, në mënyrë që të mos zhvlerësohet fare arsimi. Ka marrë goditje të shumta, mos të marrë goditje edhe në maturën shtetërore, këtë vit të paktën, përndryshe do të ishte katastrofë për këta fëmijë”, theksoi Ardi Stefa./ Brunilda Allkja – CNA.al