web counter
LEXO PA REKLAMA!

SHKARKO APP

App Store
Google Play

Cili është televizioni që kërkon të rregullojë marrëdhënien me Ramën duke përdorur Salianjin?

3 Maj 2026, 12:20, Aktualitet CNA

Ish-kryeministri dhe kryedemokrati Sali Berisha, në një komunikim virtual me qytetarët në rrjetet sociale të shtunën, ishte mjaft i ashpër ndaj Ervin Salianjit, ish-deputetit të çështjes së famshme "Babale", njeriut të dënuar për mashtrim, i cili tashmë e quan veten "të burgosur politik nga Edi Rama".

Berisha ishte i drejtpërdrejtë kur foli për lidhjet e Salianjit, si ai që ishte shitur gjatë kohës që ishte në burg, ku në fakt, ai ka qëndruar në burgun e Fierit me njerëzit e dosjes "5D", Oltion Bistrin, Pëllumb Gjokën e të tjerë. Ndërkohë që më pas Berisha e akuzoi për lidhje, pasi ka dalë jashtë, edhe me Ergys Agasin dhe Suel Çelën.

Berisha theksoi dhe një fakt tjetër: një televizion po përpiqet të përdorë Salianjin për të rregulluar marrëdhëniet me Edi Ramën. Në fakt, e vetmja media që duket të jetë më "problematike" në përballje me kryeministrin, por në fakt më shumë në konflikt me Ramën dhe me ish-zëvendëskryeministren Balluku, është televizioni “News24” i Irfan Hysenbelliut.

Jo pa qëllim edhe Sekretari i Përgjithshëm i PD-së, Flamur Noka, në një qëndrim të tij tha se mediat e paguara nga paratë e inceneratorëve kërkojnë të ndërhyjnë në garën për kreun e PD-së. Mediat e tjera nuk duken të kenë problematika me kryeministrin apo me qeverinë, “Top Channel”, “Klan”, “Vizion Plus”, mediat kombëtare; “Report TV” që është pothuajse zëri zyrtar i Partisë Socialiste, si Zëri i Popullit dikur, dhe shumë media shumë të ashpra me Berishën nuk duket të jenë në konflikt me kryeministrin Rama.

Media që ka përballje me kryeministrin

E vetmja media që duket të ketë përballje me kryeministrin është “News24”, por jo një përballje direkte. Beteja është më indirekte duke goditur ish-zëvendëskryeministren Balluku, pas përplasjes që Irfan Hysenbelliu pati me qeverinë dhe Tatimet, pasi këta të fundit kërkuan që të paguante detyrimet e sigurimeve dhe borxhet e papaguara.

Më pas, bizneset e Irfan Hysenbelliut u kapën në evazion fiskal, kontrollet te "Birra Korça" ku kamionët ngarkoheshin me sasi më të mëdha se sa figuronin në fatura; gjoba, hetime, kontrolle që sollën një përplasje të ashpër të Irfan Hysenbelliut me qeverinë, e cila për të thënë të drejtën, në këtë rast nuk kishte asnjë faj, pasi Irfan Hysenbelliu kërkonte që të mos paguante taksat, të ndërtonte pa leje e të bënte çfarë të donte, pasi i mjafton që ka një media, ka një televizion dhe mund të bëjë ç'të dojë në Shqipëri.

Lidhjet e Irfan Hysenbelliut me Erion Veliajn

Irfan Hysenbelliu njihet edhe për lidhjen e tij të fortë me kryebashkiakun e arrestuar të Tiranës, Erion Veliaj, të cilin e mbështet hapur në ekranin e tij.

Cili është televizioni që kërkon të rregullojë
Erion Veliaj dhe Irfan Hysenbelliu

Mjafton të ndjekësh televizionin “News 24” dhe kupton sesi cicëron dhe bën zëdhënësin e Veliajt nga njëra anë dhe nga ana tjetër sulmon ish-zëvendëskryeministren Belinda Balluku apo edhe ish-drejtorin e Tatimeve për interesat e tij, ndoshta edhe me porosi nga burgu i Durrësit.

Por Irfani është një mik i Veliaj dhe nuk ka kurajën të përballet direkt me Edi Ramën, por me intrigat e vogla, sulmet prapa krahëve dhe goditjet poshtë brezit, duket se do të kapërcejë problematikat që ka me Edi Ramën.

"Përdorimi" i Salianjit

Dhe një nga mënyrat që ka gjetur tashmë është edhe mbështetja që i jep Ervin Salianjit. Në fakt, ndodhi një përplasje e ashpër, Irfan Hysenbelliut gjithashtu i shembën dhe një hotel pa leje në bregdetin e Adriatikut, por ky i fundit nuk pati kurrë kurajën të përballej me kryeministrin Rama.

Ndaj tij tha vetëm dy fjalë, më pas u tremb dhe sulmin e mbajti tek ish-zëvendëskryeministrja Belinda Balluku dhe braktisi çdo njeri tjetër që e akuzoi, përfshirë këtu dhe Taulant Ballën, kreun e grupit parlamentar të PS-së, të cilit i tregoi edhe tavolinën e bukës.

Irfan Hysenbelliu kërkoi të “fshihej pas gishtit”, nuk kishte kurajon të përballej me kryeministrin Rama.

A thua se ishin Balla apo Balluku njerëzit që i kishin prishur hotelin? A thua ishte drejtori i atëhershëm i Tatimeve, Ceno Klosi, njeriu përgjegjës për atë që po i ndodhte Irfanit, kur nuk kishte bërë gjë tjetër, thjesht dhe vetëm kishte firmosur një letër drejtuar rreth gati 2000 subjekteve që duhet të paguanin detyrimet e prapambetura të sigurimeve shoqërore dhe tatimet. Por nga këta 2000 biznese doli një 'i çmendur', si Irfani, që mendonte se duke qenë pronar televizioni mund të mos i paguash taksat dhe ditë pas dite, edhe sot, pret që të ketë amnisti fiskale.

Pra, televizioni që ka probleme me qeverinë Rama dhe që Berisha e përmendi se po përdor Ervin Salianjin për t'u pajtuar dhe për të rregulluar marrëdhëniet me Edi Ramën është “News24” dhe pronari i saj, Irfan Hysenbelliu.

Ky i fundit, gati dy vite më parë doli dhe me një televizion të ri, “Panorama TV”, që falimentoi pa filluar mirë. Në atë kohë përdori ‘spektakolarin’ Alfred Peza, i cili më pas e braktisi Irfanin dhe shkoi drejt RTSH-së. Irfani njihet për lidhjen e fortë të tij me Ervin Salianjin dhe shfrytëzimin që këtij të fundit i ka bërë në median e tij. Ekrani i “News24” ka qenë në dispozicion sa të Salianjit, Grida Dumës dhe njerëzve rreth tyre, duke i mbështetur fort.

Tani, me sa duket, qëllimi i Irfan Hysenbelliut është të pajtohet me Edi Ramën që të përfitojë nga pushteti, pra të afrohet sa më shpejt amnistia, të jetë përfitues, të jepen leje ndërtimi, të vonojë apo mos paguajë taksat e tatimet.

Dhe për këtë, qartazi siç e tha edhe Berisha, po përdor Salianjin, pasi ky i fundit është i shitur tek grupet kriminale që mbështesin socialistët, siç akuzoi ish-kryeministri.

Në fakt, lidhja e Salianjit me Irfan Hysenbelliun është e vjetër dhe tashmë skema duket shumë e qartë: sipas Berishës, Ergys Agasi është njeriu që e mbështet, pra e sponsorizon edhe për aktivitetet e tij, pra për turet që Salianji ka bërë nëpër Shqipëri, pasi duhen dhjetëra miliona lekë për t'i zhvilluar këto aktivitete.

Më parë e kanë akuzuar se janë njerëzit e PS-së që ia mbushin sallat dhe tani mediatikisht është Irfan Hysenbelliu që ka “kapur për veshi” Salianjin dhe po e mbështet duke sulmuar PD-në, me qëllim që të pajtohet dhe të afrohet me kryeministrin Rama për interesat e tij okulte. /CNA





Lajmet e fundit nga