E fundit!

11:27 Aktualitet

Ç’punë kanë çunat e Albinit në protestat e Shqipërisë?

Në protestat e zhvilluara gjatë këtyre ditëve në Tiranë ja...

Bumi i industrisë së lojërave

17 Mars 2024, 09:12, Aktualitet CNA

Le të imagjinojmë për pak momente se jeni ulur me një grup miqsh dhe nisni të diskutoni për interesat tuaja, çfarë ju pëlqen të bëni në kohën e lirë, pavarësisht profesionit që keni?

Nëse filloni të flisni për një lojë dhe nuk rrethoheni nga njerëz me interes të ngjashëm, shanset janë që të tjerët të qeshin me ju dhe të konsideroheni ‘të varur’ ndaj lojërave.

Megjithatë, kur dikush ka të njëjtin diskutim në lidhje mbi një serial, film apo këngë, ju do të konsideroheni ‘antisocial’ në rast se nuk jeni të përfshirë në bisedë. Ironia e industrisë së lojërave dhe se si perceptohet në krahasim me filmin dhe industritë e tjera të argëtimit, është e tillë e dukshme në Shqipëri.

Industria e lojërave ka shpërthyer në shekullin XXI dhe po shënon rritje gjithnjë e më shumë në vitet e fundit. Qoftë në celular ose kompjuter, qoftë në platformat e specializuara për lojëra si Playstation apo X Box, lojërat po tërheqin gjithnjë e më shumë njerëz, kryesisht fëmijë dhe të rinj.

Sipas "Statista", rreth 3 miliardë njerëz në botë janë përdorues të lojërave. Në Shqipëri nuk mund të flasim për një industri të mirëfilltë lojërash, por vitet e fundit ka përpjekje për të ndërtuar një komunitet, si dhe startup-e të vogla në këtë fushë.

Sipas informacioneve në treg, ajo çka po sheh lulëzim të madh janë padyshim lojërat "online". Shuma që shpenzohet për to kap shifra të frikshme. Me ndryshimin e brezave, kërkesa për lojërat "online" është shtuar ndjeshëm, duke krijuar një mjedis konkurrues në industrinë e lojërave në vend.

Përmirësimi i teknologjisë e ka shtyrë këtë industri në një tjetër nivel, si në aspektin e aksesit, ashtu edhe për krijimin e lojërave gjithnjë e më cilësore dhe tërheqëse.

Teknologjia, motori nxitës

Industria e lojërave në internet ka përjetuar rritje të shpejtë dhe të vazhdueshme në Shqipëri, duke bërë që kjo fushë të jetë një sfidë e rëndësishme dhe një mundësi e shkëlqyer për zhvilluesit vendas. Por, nuk jemi ende në hapat që ofron teknologjia.

Çfarë do të thotë kjo? Ndonëse ka një lëvizje me një komunitet vendas në këtë industri dhe përpjekje për të sjellë lojëra të krijuara në vend, konkurrenca globale e sofistikuar e bën shumë të vështirë përçimin.

Megjithatë, me rritjen e përdorimit të internetit në Shqipëri, kërkesa për lojëra ekzistuese në internet ka shënuar rritje të ndjeshme. Një numër gjithnjë në rritje i lojtarëve ka kërkuar përvoja argëtuese dhe sfiduese në ambientet virtuale, duke hapur rrugën për një treg të pasur të lojërave online.

Pajisjet mobile kanë luajtur një rol kyç në rritjen e lojërave në internet në Shqipëri. Shumë lojëra janë zhvilluar me përqendrim të veçantë në platformat mobile, duke i bërë ato lehtësisht të arritshme për një publik të gjerë.

Në rast se do të flasim për zhvillimin e kësaj industrie, do të duhet të jemi në kërkim të talenteve vendase. Botërisht, një nga aspektet më frytdhënëse të kësaj industrie është zhvillimi i talentit në vend.

Zhvilluesit shqiptarë kanë treguar aftësi të larta në industrinë e Teknologjisë së Informacionit, megjithatë me krijimin e lojërave të ndryshme online jemi ende mbrapa.

Tomi Kallanxhi, drejtues i “Big Media Expert”, thotë për “Monitor” se megjithëse ka pasur një rritje në kërkesën vendase, zhvilluesit e lojërave në Shqipëri nuk mund t’i përballojnë sfidat e konkurrencës globale.

“Tregu global është aq i zhvilluar sa, për të qenë konkurrues, sfidat janë të mëdha. Së pari, duhen zhvillues shqiptarë me drejtim ‘gaming’, të cilët do të duhet të jenë të trajnuar për këtë.

Së dyti, në rast se duam të jemi konkurrentë botërisht, ata duhet të përdorin inovacionin dhe cilësinë e lartë të lojërave për të përmbushur pritshmëritë e lojtarëve ndërkombëtarë”, – thotë z. Kallanxhi.

I pyetur se si mund të nxitet mjedisi i zhvilluesve dhe krijimi i një baze talentesh për industrinë e lojërave në Shqipëri, eksperti i IT thotë se ka nevojë thelbësore për ndryshime në kurrikulat mësimore.

“Ndonëse prej vitesh, kërkesa për forcë punëtore në TIK është rritur, me programe shkollore apo kurse etj., në rast të zhvilluesve të lojërave, nuk është investuar në këtë drejtim.

Duhet një bashkëpunim mes Universitetit të Arteve me Fakultetin e Shkencave të Natyrës për të nxitur një bazë talentesh në këtë drejtim”, – thotë ai.

Esmerina Hidri, bashkëthemeluesja e “BEEZ Games”, thotë se, në fillim startup-i i tyre pati qëllim të ofronte shërbime për kompani të huaja që zhvillonin lojëra.

“Ndërsa ekipi ynë punonte në lojëra të dizajnuara nga të tjerët, ne në të njëjtën kohë aspironim të krijonim praninë tonë si një studio, me një vizion për të zhvilluar produktet tona. Kjo qasje e dyfishtë, jo vetëm që përmirësoi aftësitë tona, por gjithashtu gjeneroi të ardhurat fillestare të kompanisë.

Me kapitalin që kishim mbledhur dhe me ekipin, në dhjetor 2022 njoftuam se do të ndërtonim një lojë të krijuar tërësisht nga një studio shqiptare në Shqipëri”, – tha ajo.

A mund të bëjnë lojtarët para? Përgjigjja është “po”.

Ka shumë njerëz që janë profesionistë në videolojërat dhe jetojnë me to. Një shembull është nga turneu Fortnite në vitin 2019. Një 16-vjeçar i quajtur Kyle “Bugha” Giersdorf fitoi mbi 3 milionë dollarë para mbi 2 milionë njerëzve që shikonin drejtpërdrejt në stadium.

Si ndikoi pandemia në rritjen e shitjeve

Pandemia globale e COVID-19 ka ndikuar në shumë sektorë në jetët e njerëzve, duke krijuar ndryshime thelbësore në shumë fusha të ekonomisë dhe shoqërisë. Një nga sektorët që ka përjetuar një ndryshim drastik është ai i industrive të lojërave në internet.

Në Shqipëri, por edhe në botë, rritja e shitjeve të lojërave online ka qenë një fenomen i dukshëm, ndikuar drejtpërdrejt nga situata pandemike.

Distanca sociale dhe mbyllja e aktiviteteve publike bënë që shumë njerëz të kërkonin forma alternative të argëtimit dhe lidhjes sociale. Në këtë kontekst, lojërat online kanë luajtur një rol të rëndësishëm në përshtatjen e konsumatorëve ndaj këtyre ndryshimeve.

Një ndër faktorët kryesorë që ka ndikuar në rritjen e shitjeve të lojërave online është rritja e përdorimit të internetit dhe zhvillimi i e-commerce.

Në një kohë kur shumë aktivitete të jashtme u ndaluan, bizneset vendase raportuan se, lojërat online ofruan një formë ekuilibri midis argëtimit dhe lidhjes sociale, duke lejuar lojtarët të komunikojnë dhe të luajnë së bashku, pavarësisht distancës fizike.

Në aspektin ekonomik, rritja e kërkesës u përkthye në pozitive për bizneset që ofruan këtë shërbim gjatë asaj periudhe.

Industria e lojërave mendohet të ruajë rritjen e shpejtë dhe mund të arrijë vlerën e 321 miliardë dollarëve deri në vitin 2026, thotë një raport i ri i PwC.

Bumi i industrisë së lojërave

Arsye të tjera

Një pjesë integrale e rritjes së shpejtë të industrisë së lojërave në hierarkinë e argëtimit ka qenë roli i marketingut dixhital dhe platformave të mediave dixhitale.

Platformat si Twitch, YouTube dhe madje edhe Facebook Gaming kanë revolucionarizuar mënyrën se si lojtarët ndërveprojnë me bazat dhe komunitetet e tyre të fansave.

Këto platforma, prej vitesh, kanë demokratizuar krijimin e përmbajtjes, duke i lejuar lojtarët, pavarësisht nga vendndodhjet gjeografike, të transmetojnë lojën e tyre, të angazhohen me fansat në kohë reale dhe të krijojnë komunitete që janë jashtëzakonisht besnikë dhe tepër të angazhuar.

Kjo dritare jashtëzakonisht inovative e shikueshmërisë dhe angazhimit të personalizuar është një minierë ‘ari’ për reklamuesit.

Reklamimi tradicional zakonisht ka të bëjë me kapjen e një audience të gjerë. Marketingu dixhital brenda ekosistemit të lojërave lejon reklamimin e hipershënjestruar, duke siguruar që markat të arrijnë demografinë e tyre të dëshiruar me saktësi.

Reklamimi në lojë, partneritetet me influencues dhe përmbajtja e sponsorizuar janë bërë normë dhe markat janë të gatshme të investojnë miliarda për të siguruar që prania e tyre të ndihet brenda këtyre transmetimeve të hipersegmentuar dhe të synuar.

Integrimi i markave brenda universit të lojërave është një dëshmi e evolucionit të industrisë.

Sot, është mjaft e zakonshme të shohësh marka të njohura dhe të famshëm që shfaqen brenda botës së lojërave virtuale.

Këto bashkëpunime të kryqëzuara lejojnë fansat të ndërtojnë një lidhje dhe afinitet më të thellë, duke krijuar edhe më shumë besnikëri ndaj markës brenda këtyre komuniteteve dixhitale globale.

Qindra miliarda dollarë për lojëra

Sipas vlerësimeve, industria e lojërave gjeneroi rreth 200 miliardë dollarë në vitin 2022. Kjo është një rritje e madhe për vetëm dy vjet krahasuar me vitin 2020, kur industria vlerësohet të peshonte rreth 155 miliardë dollarë, ndërsa thuajse është dyfishuar në pesë vitet e fundit.

Pandemia e COVID-19 dhe kufizimet e lëvizjes së qytetarëve i dhanë më tepër shtysë rritjes së industrisë së lojërave.

Parashikimet e ekspertëve për të ardhmen janë se industria e lojërave do të vazhdojë të rritet, me një mesatare prej 12-13% në vit, duke kaluar vlerën e 500 miliardë dollarëve deri në vitin 2030.

Kinezët, amerikanët dhe japonezët shpenzojnë më shumë

Sipas të dhënave, Kina dhe ShBA-ja kryesojnë listën e vendeve ku industria e lojërave gjeneron më shumë të ardhura.

Të dyja vendet gjenerojnë rreth 45 miliardë dollarë në vit secila.

Pas tyre vjen Japonia, ku kjo industri peshon rreth 20 miliardë dollarë. Listën e 10 vendeve që gjenerojnë më shumë të ardhura e plotësojnë Koreja e Jugut, Gjermania, Mbretëria e Bashkuar, Franca, Kanadaja, Italia dhe Brazili.

Në llogaritjen e këtyre shpenzimeve përfshihen vetëm blerja e lojërave dhe mikrotransaksionet brenda lojës, pra nuk llogariten shpenzimet për blerjen e platformave./ Monitor.al