Një jetë me art e emocion/ "Babai" i shfaqjes "Shi në plazh" feston 76 vjetorin e lindjes

7 Nëntor 2023, 21:59, Aktualitet Agim Xhafka

Një jetë me art e emocion/ "Babai" i shfaqjes "Shi

Gëzim Kame

Sot mbush 76 vjet Gëzim Kame, ai që na mbushi një jetë me art, me emocion, me ngazëllim, hare, lot e trokitje zemre si breshër i rrëmbyeshëm. Mbase populli nuk e di kush është, nuk ia di fytyrën,të folurën a gjestet. Por ikonat e teatrit, vip-at e skenës të bëjnë të marrë po të shfaqësh mosnjohje për të. Robert Ndrenika,Roland Trebicka,Mirush Kabashi,Viktor Zhusti,Rajmonda Bulku,Mehdi Malka,Suela Konjari,Hervin Çuli,Elvira Diamanti...janë "balta" të cilën Gëzim Kame si baba Carlo e ktheu në Pinok, në personazhe të pavdekshëm.

Sot në botë njohin krejt regjisorët e Hollivudit, përmendin Polanskin, Spilbergun, Voodi Allen, Tarantino...dhe për fat të keq tek ne këta zemberekë të spektaklit janë të fshehur,të mbuluar nga një tis i hollë harrese prej medias së pari e më pas prej një publiciteti të munguar.

Po mjafton të thuash se "babai" i shfaqjes "Shi në plazh" është Gëzim Kame e kaq të bën të ngrihesh zgupthi e të heqësh kapelen para këtij artisti kaq të madh. Ose të përmendësh "Sokratin" luajtur nga Mirush Kabashi e të ulërasësh,o njerëz regjisor i asaj shfaqjeje ka qënë Gëzim Kame,paçka se deri në afishe të shumta hera herës nuk iu shkruajt emri.

76-vjetori i këtij artisti është një rast i mirë per të treguar botërisht se ky regjisor ka qënë ndër më prodhuesit, por dhe ndër më konçizët. Ishte jo si verë tavoline, por si një pije e vjetër prodhuar në vreshtat e Francës. Plot shije, plot aromë, plot vlera sikur të dehte.

Jeta artistike e Kames nisi me ëndërrat në gjimnaz e vazhdoi me Institutin e Arteve. Student,aktor,pedagog,dekan. Një cikël,i plotë që nderon atë institucion. Shoh tek një dritare në një pallat buzë Lanës një mbishkrim:"Këtu ka jetuar artisti Naim Frasheri." Sa mirë, them sa herë e lexoj. Se janë shenja të qytetërimit tonë. Kështu duhet të vendosë sot Akademia e Arteve një gdhendje: "Këtu ka dhënë mësim Gëzim Kame." Se ai është si vatra e zjarrit,ka gatuar e ka ngrohur me mendjen dhe shijet e tij. Në Rinas ende blihet me shumicë "Shi në plaz", një komedi me atmosfere e gaz pa fund,pa ngjyra të politikë së kohës e me një lojë mjeshtërore të artistëve. Po sa të tilla ka ky gjeni! Që nga "Mësuesi i Letërsisë", "Fernando Krafti më beri një letër", "Shtëpia e Bernarda Albës”,”Darka e të marrëve", "Stinë e mërzitshme në Olimp", "Pjata e drunjtë", "Të gjithë me huqe",uf,u lodha së numëruari. E asnjë dështim,veç sukses,sukses,sukses...

Tani Gëzim Kame mbase është mbledhur diku me miq e shokë për të festuar pa bujë e zhurmë. Si iriqi që rri brenda ferrës. Ai hesht, por nuk rresht së menduari, së bëri plane. Shoqëria gëzohet se jeton mes tyre artisti që prodhoi artistë,"materniteti" i aktorëve cilësorë. Shokët e miqtë e tij janë të çdo fushe. Të artit e të shkencës,të diplomacisë e politikës. Edhe unë jam shok i tij prej vitesh e vitesh. Shoqëri që në themel pati skenën e më pas gëzimet per njëri tjetrin.

Sigurisht skena është qendra e festimeve të ditëlindjes së tij. Si një lloj Kane apo Los Angeles ku ndahen çmimet. Atje të mblidhen artistë e artiste,shokë e miq. Dhe mjeshterit t’i urojnë,u bëftë 101 vjeç. Unë do e bëja 102,por e di që ai edhe kur do na takojë e shohë në sy do e ketë vështrimin përtej se mendja i punon për dramën e radhës,pér spektaklin që vetëm ai di si ta bëjë kaq të shijshëm me arra e lajthi Shqiperie,por dhe me erëza nga Kina,India e Spanja. Ndaj quhet art,se ka kaq shumë perzierje historie e personazhesh sa regjisori ua di radhën e i sjell si në avlëmend,ngjyrë pas ngjyre e fije për fije.

Gëzim,paç jetë të gjatë edhe për kënaqësinë time! Amen!