Paralajmëron Nesho: Me marrëveshjen, Rama po i krijon vendit një bombë

7 Nëntor 2023, 19:23, Aktualitet CNA

Paralajmëron Nesho: Me marrëveshjen, Rama po i krijon vendit një

Agim Nesho

Diplomati Agim Nesho, në një intervistë për CNA, ka deklaruar se Shqipëria nuk i ka kapacitetet e nevojshme për të pritur emigrantët që i refuzon Europa.

Nesho paralajmëron se, me këtë marrëveshje Rama po i krijon vendit një bombë me shpërthim të vonshëm.

“Sigurisht ky është nonsensi i parë në pranimin e kësaj marrëveshje nga Rama. Europa e Bashkuar operon në respektim të parimeve dhe vlerave perëndimore dhe i respekton këto edhe me vendet e treta. Problem për Europën nuk janë hapësirat dhe kushtet për trajtimin e emigrantëve, por problemet sociale, politike që krijohen nga një fluks i madh i tyre, por mbi të gjitha nga reagimi popullor në vendet e tyre. Prandaj ata gjejnë dhe peshkojnë liderë autokratë që vendin e tyre e konceptojnë si një pronë private, ku institucionet e vendit janë të kapura, ku Parlamenti është një vegël në dorë të monarkut. Për këta lidera më e rëndësishme janë ‘qokat’ për liderët e botës së lirë sesa interesat e popullit të tij. Shqipëria jo vetëm nuk ka kapacitetet e nevojshme por po i krijon vendit një bombë me shpërthim të vonshëm”, është shprehur Nesho.

I pyetur pse kryeministri ka pranuar një marrëveshje të tillë, që më herët e ka kundërshtuar, Nesho tha se, nuk është hera e parë që Rama bënte një marrëveshje të tillë klienteliste duke përmendur këtu marrjen e muxhahedinëve, afganët, armët kimike siriane e të tjerë.

Diplomati thekson se Rama po e kthen vendin në një kosh plehrash për vështirësitë që kanë liderët e botës së lirë.

Gjithashtu thotë se, kur kryeministri është në vështirësi vetë-ofron një ndihmë për vendet e mëdha.

“Nuk është hera e parë që kryeministri Rama bën marrëveshje të tilla klienteliste, si me marrjen e muxhahedinëve, afganëve, armët kimike siriane, etj., duke e kthyer vendin tonë në një refugium peccatorum apo kosh plehrash për vështirësitë që kanë liderat e botës së lirë. Rama është një demagog kur thotë se ‘e bëjmë pasi me Italinë kemi një borxh të madh’. Të njëjtën marrëveshje ai i ka ofruar edhe Gjermanisë, pasi u diskretitua me projektin serb të ndryshimit të kufijve. Gjithmonë kur Rama ndjehet në vështirësi qeverisjeje ai vetë-ofron një ndihmë për vendet e mëdha. Dhe sot Rama është një personazh i diskretituar me një qeverisje të dështuar, me korrupsion galopant, me lidhjen me krimin e organizuar etj, etj. Prandaj Rama është i kujdesshëm dhe i vëmendshëm ndaj vendeve si Italia, Britania e Madhe, Gjermania, të cilat zotërojnë informacione të detajuara të lidhjes së politikës Shqiptare me krimin, mafian, me kompanitë offshore, etj. Ai është i detyruar të ruajë pushtetin politik e financiar të tij duke u vetë-ofruar”, ka përfunduar Nesho./ CNA