web counter
LEXO PA REKLAMA!

SHKARKO APP

App Store
Google Play

E fundit!

x

Marrëveshja për emigrantët/ Diplomati Nesho: E dyshimtë, Rama nuk ka të bëjë fare me shtetin e të drejtës

7 Nëntor 2023, 17:14, Aktualitet CNA
Marrëveshja për emigrantët/ Diplomati Nesho: E dyshimtë,
Diplomati Agim Nesho

Një ditë më parë kryeministri Edi Rama gjatë vizitës së tij në Itali dhe takimit me Giorgia Melonin ka nënshkruar një marrëveshje për emigrantët, ku në Shëngjin do të ngrihen dy qendra të cilat do të presin emigrantët e paligjshëm.

Shqipëria do të presë të paktën 3 mijë emigrantë për periudha të caktuara. Lidhur me këtë marrëveshje ka reaguar për CNA diplomati Agim Nesho.

Nesho ka thënë për CNA se kjo është një marrëveshje e fshehtë , e dyshimtë dhe është bërë për t’i shërbyer programit qeverisës së Giorgia Melonit dhe përpjekjeve të saj për menaxhuar krizën e emigrantëve.

Diplomati thekson se kjo marrëveshje nuk do t’i shërbejë Shqipërisë por vetëm do të krijojë një situatë kritike për çështjen e sigurisë së vendit dhe problemeve të ardhshme sociale.

Nesho shton se nëse deklaratat e Ramës që ‘në qoftë se kërkesat për azil refuzohen nga Italia, Shqipëria do ti deportojë”, sipas tij tregojnë sa qesharak dhe aventurier është kryeministri Edi Rama.

“Marrëveshja Rama-Meloni është një marrëveshje e fshehtë, e dyshimtë për qëllimin që bëhet dhe një akt për ti shërbyer programit të qeverisë Meloni si dhe përpjekjeve të saj për të menaxhuar krizën e emigrantëve. Nga kjo marrëveshje Shqipëria nuk përfiton asgjë, përvecse evidentohet karakteri klientelist i Kryeministrit Rama, i cili vazhdon të bëjë të pëlqyeshmin për ndërkombëtarët në këmbim të ruajtjes së pushtetit të tij të pakufizuar. Ai vazhdon ta trajtojë Shqipërinë si një pronë private dhe një tokë djerrë ku shqiptarët duhet të largohen dhe afrikanët ti ndihmojnë në shërbimet e vendit.

Nga kjo marrëveshje Shqipëria përfiton vetëm një situatë më kritike për cështjet e sigurisë së vendit dhe problemeve të ardhshme sociale që do të stimulohen nga një numër tepër i madh emigrantësh afrikanë të cilët do të kërkojnë hapësira për të jetuar. Deklaratat e Ramës që ‘në qoftë se kërkesat për azil refuzohen nga Italia, Shqipëria do ti deportojë”, tregojnë se sa qesharak dhe aventurier është kryeministri ynë”, tha Nesho.

Më tej diplomati tha për CNA se kjo marrëveshje bie ndesh me Kushtetutën dhe ligjin shqiptar pasi është anashkaluar konsultimi me popullin, opozitën si dhe kjo marrëveshje nuk është paraqitur në parlament.

Kjo tregon sipas diplomatit se Rama nuk ka të bëjë fare me shtetin e së drejtës.

“Marrëveshja Rama-Meloni bie ndesh me Kushtetutën dhe ligjin shqiptar dhe mënyra e realizimit të marrëveshjes në mënyrë të fshehtë duke anashkaluar konsultimin e popullit, të opozitës, dhe paraqitja e marrëveshjes në fund Parlamentit si një fait a complie tregon se kryeministri Rama nuk ka të bëjë fare me shtetin e së drejtës. Krijimi i një zone ekstraterritoriale në Shqipëri jo vetëm bie ndesh me Kushtetutën por është e dënueshme edhe nga Kodi Penal. Kjo marrëveshje krijon probleme me zbatueshmërinë e ligjit në territorin Shqiptar, për respektimin e të drejtave të njeriut deri në bashkëfajësi në rastin e përdorimit të forcës kur emigrantët mund të revoltohen për trajtimin e tyre.

Për Italinë, kjo marrëveshje minimalisht duhet të miratohet nga parlamenti, por duhet të jetë në përputhje me të drejtën e Bashkimit Europian si dhe të drejtën ndërkombëtare. Britania e Madhe aplikoi krijimin e qendrave ekstraterrioriale të azilit në Ruanda por u kundërshtua nga Gjykata Europiane për të Drejtat e Njeriut. Shtrirja e juridiksionit të Italisë në sovranitetin e një vendi tjetër jashtë Bashkimit Europian krijon një precedent të gabuar që kundërshtohet nga ekspertët e të drejtës ndërkombëtare. Sipas kryeministres Meloni kjo marrëveshje është një aranxhim politik që do të shoqërohet me rregullimet përkatëse ligjore”, ka deklaruar Nesho për CNA./ CNA

 





Lajmet e fundit nga