Arta Dade kthehet pas në kohë/ Momenti i sikletshëm kur prezantoi Festivalin e 13-të të Këngës

10 Nëntor 2022, 23:05, Aktualitet CNA

Arta Dade kthehet pas në kohë/ Momenti i sikletshëm kur prezantoi

Ish-ministrja e Jashtme dhe ish-deputetja e Partisë Socialiste, Arta Dade

Ish-ministrja e Jashtme dhe ish-deputetja e Partisë Socialiste, Arta Dade, është kthyer pas në kohë dhe ka folur për momentin që është ngjitur në skenën e Festivalit të 13-të të Këngës në "RTSH".

Dade tregoi në "A2 CNN" disa momente të sikletshme që ka kaluar për ta prezantuar këtë festival. Ajo tha se njëra nga sikletet ishte gjetja e fustanit të përshtatshëm, ndërsa momenti i dytë ka qenë kur është ngjitur në skenë.

Ish-deputetja rrëfeu se sapo ishte hapur perdja, i kishte marrë mikrofonin me vete dhe në atë moment ishte hutuar dhe në nervozizëm kishte ngatërruar emrat e regjisorit dhe të dirigjentit.

“Unë besoj se shpeshherë jam gjendur para dilemave dhe nga natyra jam edhe kurajoze kështu që megjithë ndonjë hezitim të familjes që unë të mos e pranoja këtë gjë për të prezantuar festivalin e 13-të, unë vendosa se nuk është se nuk kisha përvojë në këtë drejtim.

Shpeshherë edhe në jetën time edhe si studente, apo edhe që në shkollën 8-vjeçare, fillore, jeta artistike ka qenë e pasur dhe në përgjithësi e kisha gjetur veten te prezantuesja. Kam pasur raste që me motrën kemi kënduar edhe duete në shkollë se kemi qenë të dyja bashkë, por më shumë e gjeja veten te prezantuese.

Në fakt, në festivalet e fobisë, fëmijëve, në Tiranë kam prezantuar festivalin e dytë, kam edhe fotografitë në shtëpi, pastaj edhe kur kam qenë studente ne bënim festivalin e këngës popullore, festivalin e valleve. Madje kam qenë studente dhe jam veshur me kostumin popullor të Tiranës, edhe atë e kam prezantuar.

Por sigurisht festivali i 13-të qe një përvojë shumë pozitive. Mbaj mend që kur u hap perdja, e mori me vete mikrofonin nga ana ime dhe isha si në dilemë çfarë do bëja unë tani, a duhet ta ngrija mikrofonin dhe të filloja të flisja dhe pata një moment hutimi, dëgjova dhe kameramanin që tha ‘opa filloi tersi’ dhe ai ma shtoi më shumë atë ankthin dhe besoj që kam gabuar në emrat e regjisorit dhe të dirigjentit.

Pra, e kam thënë Mevlan Shanaj dy herë, edhe si regjisor të festivalit, edhe si dirigjent në një kohë kur ishte Ferdinand Deda. Apo ajo vështirësia për të gjetur një fustan të përshtatshëm. Ishte shumë vështirë atëherë për të gjetur një fustan të përshtatshëm. Arrita të gjej një fustan të Zilia Silës”, theksoi ajo./ B.A. – CNA.al