web counter
LEXO PA REKLAMA!

SHKARKO APP

App Store
Google Play

Ambasadori britanik zbulon shifrën/ Sa shqiptarë jetojnë ilegalisht Angli

26 Tetor 2022, 20:42, Aktualitet CNA
Ambasadori britanik zbulon shifrën/ Sa shqiptarë jetojnë
Ambasadori britanik, Alastair King-Smith

Ambasadori britanik, Alastair King-Smith, ka folur mbrëmjen e sotme në lidhje me videot që po qarkullojnë në rrjetet sociale, ku shtetas shqiptarë ikin drejt Anglisë me gomone.

King-Smith tha se ky fenomen është shqetësues dhe për të gjetur një zgjidhje do të vijë në Shqipëri një delegacion i nivelit të lartë për bisedime me autoritetet tona.

“Pra, jam plotësisht dakord me ju. Është shumë shqetësuese që ky fenomen tani po ndodh me një shkallë dhe shpejtësi shumë më të madhe se më parë. Kemi parë mbi 12,000 shqiptarë që kanë shkuar deri tani këtë vit, kjo është shumë më shumë se disa qindra nga viti i kaluar. Dhe sigurisht, siç thoni ju, këto janë udhëtime të rrezikshme, ne po marrim masa për ta adresuar këtë fenomen në Mbretërinë e Bashkuar. Por gjithashtu duhet ta bëjmë këtë në bashkëpunim me partnerët tanë këtu në Shqipëri. Javën e ardhshme do të kemi një delegacion të nivelit të lartë të kryesuar nga koordinatori ynë i ri për Shqipërinë dhe këtë çështje që ka të bëjë me migracionin ilegal dhe synojmë të biem dakord për përgjigjen tonë kolektive se si do të reagojmë për ta trajtuar këtë çështje. Nuk është një çështje e lehtë, por është një çështje për të cilën duhet të punojmë vërtet së bashku”, u shpreh ai në emisionin “Shënjestër”.

Duke iu referuar ambasadorit shqiptar në Londër, Alastair King-Smith zbuloi se në Angli mund të jenë rreth 150,000 shqiptarë ilegalë.

“Është shumë e vështirë të thuash saktësisht se sa, sepse, sigurisht, kur njerëzit shkojnë ilegalisht, ata janë të paregjistruar. Ambasadori shqiptar në Londër vlerëson se mund të jenë rreth 150,000 shqiptarë, me origjinë shqiptare dhe ky është një numër i konsiderueshëm dhe mendoj se është në rritje dhe sigurisht kjo ka qenë një nga arsyet pse më shumë njerëz kanë shkuar këtë vit,  sepse kanë lidhjet familjare tani në MB”, theksoi ai./ B.A. – CNA.al





Lajmet e fundit nga