Ahmetaj nxjerr "zbuluar" Veliajn/ Akuza kryebashkiakut dhe SPAK-ut

12 Tetor 2023, 18:15, Aktualitet CNA

Ahmetaj nxjerr "zbuluar" Veliajn/ Akuza kryebashkiakut dhe SPAK-ut

Arben Ahmetaj

Ish zëvendëskryeministri Arben Ahmetaj, përveç se ka goditur mediat e inceneratorëve për akuzat e ngritura ndaj tij dhe sulmet e vazhdueshme në lidhje me privatizimin e ish fabrikës së bukës, ka nxjerrë zbuluar dhe ka hedhur akuza ndaj kryebashkiakut Erion Veliaj.

Në reagimin e tij të gjatë në rrjetet sociale, Ahmetaj nënvizon një detaj që implikon kryebashkiakun Veliaj duke thënë se familjarët e ish pronarëve të fabrikës kanë tërhequr padinë ndaj Veliajt ndërkohë që Ahmetaj akuzon se është kryebashkiaku që ka dhënë lejen për ndërtimin mbi truallin e ish fabrikës, pas vendimit të Gjykatës së Apelit, e cila e ka anuluar procedurën e privatizimit të kësaj fabrike.

Kështu ai nxjerr zbuluar Veliajn, pasi ky i fundit ka dhënë lejen për ndërtimin duke shkelur vendimin e gjykatës.

“Familja e nderuar e ish-pronareve ka të drejtën për të ndjekur të drejtën që mendon se i takon, por cila është arsyeja që në Qershor të vitit 2022 ajo ka bërë një kallëzim specifikisht për Arben Ahmetaj? Mos vallë kjo përkon e promovuar me persekutimin e përndjekjen time politiko-mediatiko-juridike?

Cila është arsyeja që familja e nderuar e ish-pronarëve ka tërhequr padinë ndaj institucionit që ka dhënë lejen e ndërtimit, ndërkohë që Gjykata e Apelit ka dhënë vendimine formës së prerë për anulimin e privatizimit?

Si ka mundësi që është dhënë leje ndërtimi në gusht të 2018, ndërkohë që Vendimi i Gjykatës së Apelit ka dalë në Nëntor të 2017. Vendimi i Gjykatës është ligj për të gjithë dhe i zbatueshëm në vetvete. E vetmja që s’ka marrë asnjë vendim apo veprim në kundërshtim me Vendimin e formës së prerë të Gjykatës së Apelit është Ministria e Ekonomisë drejtuar nga unë në atë periudhë”, ka shkruar Ahmetaj.

Më tej, ish zëvendëskryeministri Arben Ahmetaj, ngre pikëpyetje në lidhje me hetimet e kryera nga SPAK për këtë çështje.

Përmes disa pretendimeve, Ahmetaj thotë se SPAK anashkalon faktin se aksionet shtetërore janë mbrojtur dhe ka injoruar rolin e ministrit dhe faktin që ministri i Ekonomisë nuk bën vlerësim apo rivlerësim asetesh apo askionesh pasi kjo pjesë e procedurës sipas Ahmetajt bëhet nga vlerësues të pavarur e të certifikuar të cilët janë në listën zyrtare të institucionit.

Ahmetaj ngre pikëpyetjen në lidhje me hetimet e SPAK, duke pretenduar se po shmang përfshirjen e Veliajt dhe shkeljen e bërë nga kryebashkiaku.

“Si ka mundësi që SPAK anashkalon faktin që aksionet shtetërore janë mbrojtur dhe jo e kundërta? Si ka mundësi që SPAK injoron apo anashkalon rolin e Ministrit të Ekonomisë si person politik? Si ka mundësi që SPAK anashkalon apo injoron faktin ligjor që Ministri i Ekonomisë nuk bën vlerësim apo rivlerësim asetesh dhe aksionesh, por kjo pjesë e procedurës bëhet nga vlerësues të pavarur e të certifikuar të cilët janë në listën zyrtare të institucionit.

Si ka mundësi që institucioni i akuzës, SPAK, shprehet në media për supriza hetimore apo habi në lidhje vetëm me dosjet Ahmetaj? Mos vallë ky institucion është kontaminuar në damarët e vet nga strategjia e ”Deles së zezë”? Mos vallë ka tendencë apo urrejtje të pajustifikuar personale? Apo kjo është çështje karriere dhe përmbushje statistikash pa cilësi?!”, shkruan Ahmetaj./ CNA