Afera “5D”/ Ilir Alimehmeti flet për skenarët e aksionit opozitar

23 Prill 2024, 15:33, Aktualitet CNA

Ilir Alimehmeti

Bashkia e Tiranës, të hënën refuzoi të mbledhë Këshillin Bashkiak, një gjë kjo e kërkuar në mënyrë urgjente nga opozita, për të siguruar llogaridhënien, lidhur me aferën e drejtorëve dhe bashkëpunëtorëve të Veliajt. Në një intervistë për CNA, Këshilltari Bashkiak demokrat, Ilir Alimehmeti, u shpreh se argumentet e dhëna nga socialistët ishin të pabaza.

"Urgjencë më të madhe se ky skandal, Tirana nuk ka. Megjithatë, nga data 5 prill deri në datën 22, iu deshën 17 ditë kryesisë së Këshillit Bashkiak për ta shqyrtuar. Në këtë aspekt, duke parë që kjo kërkesë nuk u mbështet nga Partia Socialiste, atëherë mblodhëm 7 forca të ndryshme dhe bëmë 21 firma që i depozituam në mëngjes në protokoll, përpara se të ndodhte mbledhja e pasdites. Praktikisht ishte e njëjta kërkesë, por tashmë me 21 firma. Ata kërkuan kohë për ta shqyrtuar të njëjtën kërkesë, vetëm se këtë herë kishte firmat e nevojshme."

Alimehmeti parashtroi kërkesat e opozitës, duke theksuar se është domosdoshmëri të kryhet audit i jashtëm i bashkisë.

"Kërkesa për auditim të jashtëm, një nga kompanitë e mëdha ndërkombëtare të pavarura, për të parë të gjitha veprimtaritë financiare të bashkisë, në kohën kur nuk ka pasur hetim nga KLSH, për të mos mbivendosur elemente. Kërkuam një komision hetimor. Mjafton vetëm një këshilltar për të kërkuar këtë, por as këtë nuk deshën ta vendosin në rend dite."

Këshilltari i djathtë ndau detaje se cilat do të jenë hapat e radhës që do të ndërmarrë opozita.

"Kemi detyrën e informimit të diplomacisë së huaj në Shqipëri, se si bllokohet informacioni, si nuk jepet e drejta për mbledhjen e Këshillit. S'ka as procesverbale të votimeve të projektvendimeve. Ndoshta këta diplomatë të huaj qenkan të paqartë çfarë po ndodh me korrupsionin.

Për herë të parë kemi një ministër për pushtetin vendor. Ne do t'i drejtohemi kësaj ministrie, t’i bëjmë të ditur se Këshilli nuk funksionon. Ne duhet të bëjmë detyrën tonë. Ka pasur shtigje që këta kanë ndjekur, për të vjedhur fondet publike, shtigje që ne duhet t'i mbyllim, që të mos na vijë një Tusha, Qato, Molla, apo Veliaj."

Sa u përket protestave, Alimehmeti theksoi se nuk është iniciativë e opozitës, por e qytetarëve dhe vazhdimësia e tyre do t'u lihet në dorë qytetarëve. / CNA