E fundit!

19:46 Politikë

“Këshilli Kombëtar, kozmetikë e Berishës”/ Spaho: PD do e ketë të pamundur të jetë rivale e PS

Ish-nënkryetari dhe ish-deputeti i PD-së Edmond Spaho ka k...

14 fshatra të izoluara prej dy javësh në Kolonjë, banorët në protestë për urën e dëmtuar

27 Nëntor 2025, 12:10, Aktualitet CNA

Banorët e disa fshatrave të zonës së Kolonjës kanë dalë sot në protestë në Qafëzez, pranë urës së Baba Selimit, mbi lumin Osum.

Prej gati dy javësh, 14 fshatra vijojnë të jenë të izoluara për shkak të dëmtimeve të rënda që shirat dhe përmbytjet e javës së kaluar i kanë shkaktuar urës lidhëse me rrugën kryesore. Sipas banorëve, situata është bërë alarmante pasi në fshatrat e thella ka edhe persona të sëmurë që presin ndihmë, ndërsa mungesa e aksesit po rëndon çdo aspekt të jetës së tyre. Një prej banoreve shprehet se prej 20 ditësh nuk ka mundur të takojë vajzën që ndjek shkollën në Ersekë, ndërsa vetë ka nevojë për kontrolle mjekësore pas një aksidenti.

"Kam 20 ditë pa parë vajzën, e kam në shkollë në Ersekë se këtu është mbyllur shkolla. Kam pësuar edhe një aksident dhe kam 20 ditë pa i bërë kontroll këmbës. Nuk kanë marrë masa, e marrim kryetarin në telefon dhe nuk përgjigjet, e mbyll telefonin. Ku të kalojë vajza ime 11 vjeçe në këtë urë?"

Një tjetër protestues rrëfen vështirësitë për të siguruar ilaçe dhe ushqime, duke thënë se bashkia i takon vetëm për t'u marrë votat në fushatë.

"Ura dhe rruga e prishur, ku t'i marrim ilaçet? Po bëjmë dy javë të izoluar. 14 fshatra janë të izoluara. Këta na vijnë vetëm për zgjedhje, ato dy ditë, më pastaj nuk i shikojmë me sy. Nëpër fshatra kanë mbetur vetëm pleq. Nuk kalojnë mjetet, ne as në këmbë nuk shkojmë dot. Fëmijët na ngelën në Ersekë që janë në shkollë."

Banorët thonë se izolimi ka paralizuar edhe blegtorinë dhe ekonominë familjare. Në protestë ngrihet edhe shqetësimi për rrezikun që mund të sjellë niveli i lartë i lumit Osum, sidomos nëse hapet rezervuari i Kozelit.

"Jemi të izoluar totalisht. Blegtorinë e kemi pa tagji, s'kemi nga ta sjellim. Jemi izoluar nga ura, s'kemi ku të vemë. Nuk kalohet, edhe rruga më tutje po prishet. Asnjë masë nuk është marrë, e as kanë për të marrë. Vijnë vetëm kur kërkojnë votat."

"Jemi në hall të madh, këtu s'ka as shtet, asgjë. Ura ka 2 javë e prishur, ka njerëz të sëmurë në zonat malore, janë 10-15 fshatra të izoluara. Unë jam në hall se jam jashtë e po rri si qeni dhe s'vijnë njëherë të shohin gjendjen e shtëpisë. Lumi është shumë i rrezikshëm, sidomos po të hapet rezervuari i Kozelit e përmbyt tërë fshatin. Ndihemi të rrezikuar sepse po plasi ai, s'mbetet gjë këtu."

Banorët kërkojnë ndërhyrje të menjëhershme nga institucionet dhe rikonstruksionin e urës sa më shpejt, duke theksuar se ndihen të braktisur dhe të pambrojtur në një situatë që po zgjat shumë më tepër sesa mund të përballojnë./ CNA