web counter
LEXO PA REKLAMA!

SHKARKO APP

App Store
Google Play

E fundit!

x

Raporti mes kishës dhe kombit/ Mesazhi i fortë i Kryepiskopit Joan: Një njeri që mohon atdheun, mohon Zotin

27 Nëntor 2025, 10:57, Aktualitet CNA

Raporti mes kishës dhe kombit/ Mesazhi i fortë i Kryepiskopit Joan:

Teksa jemi në prag të festave të nëntorit, Kryepiskopi Joan, në një intervistë per median "Ngjallja" ka dhënë mesazhe të forta për atdhedashurinë.

Fortlumturia e Tij, Joani, ka theksuar rëndësinë e atdhedashurisë si një element të pazëvendësueshëm të jetës fetare dhe të dashurisë për Zotin.

Kryepiskopi nënvizon se të duash vendin ku ke lindur dhe je rritur nuk është në kundërshtim me dashurinë për kishën apo universalisht për njerëzit, por përbën një harmoni mes dashurisë për të veçantën dhe për të përgjithshmen.

Fortlumturia e Tij, Joani, shpjegon se mohimi i atdheut është në fakt mohim i Zotit, pasi çdo njeri është kujdestar i vendit të tij dhe ka detyrë të përpiqet për përparimin, begatinë dhe paqen e tij.

“Raporti ndërmjet kishës dhe kombit është një raport i komplikuar, por shpeshherë në mënyrë artificiale janë vënë sikur janë në kundërvënie. Pa dyshim, kisha na mëson t'i duam të gjithë, na mëson që ta duam vendin tonë, atje ku jemi lindur dhe rritur. Kjo dashuri është pjesë e një dashurie të madhe që është për të gjithë njerëzit. Të gjithë njerëzit kanë një dashuri për familjen, për prindërit dhe, padyshim, do të kenë një dashuri për atdheun, sepse është e pamundur të duash Perëndinë dhe të mos duash vendin ku ke lindur dhe je rritur.

Shpeshherë shumë njerëz vendosin një pikëpamje sikur këto dy gjëra i kundërvihen njëra-tjetrës. Të duash kishën dhe të duash Zotin, padyshim që do ta duash edhe atdheun. Kjo nuk është që të duash njërën dhe të mos duash tjetrën. Për shembull, të duash atdheun dhe të mos duash Zotin, apo anasjelltas.

Ky raport është shumë i rëndësishëm, sepse nëse nuk do të kemi dashuri në shpirt për vendin tonë, kjo është një ofezë karshi Zotit. Kisha nuk e mohon etninë. Pa dyshim që kisha është universale dhe e kapërcen atë; Kisha beson në vëllazërimin e gjithë popujve të botës; Kisha është katolike, që i përfshin të gjithë, është e përgjithshme.

Por raporti ndërmjet së përgjithshmes dhe së veçantës nuk është një kundërvënie e njërës kundër tjetrës, por është një harmoni e njërës me tjetrën. Duke dashur Zotin dhe duke i dashur të gjitha këto të tjerat, padyshim që do të duam akoma më shumë dhe ato që kemi rrotull. Dashuria nuk është diçka abstrakte: të duam njerëz dhe gjithë botën në përgjithësi, por të duam njerëzit që i takojmë çdo ditë, njerëzit që i shohim çdo ditë.

Të duash vendin tënd është pjesë e kësaj gjëje, ndaj kisha nuk e mohon etninë. Mohimi i etnisë, të paktën në këndvështrimin tim, është mohim i Zotit. Një njeri që mohon atdheun e tij, mohon kombin e tij, ka mohuar dhe Zotin. Prandaj kisha na mëson që ta duam vendin tonë. Të duash vendin do të thotë që të përpiqesh me gjithë shpirt që ai vend të përparojë, të begatojë dhe të jetojë në paqe e harmoni. Është detyrim i çdo të krishteri që ta dojë vendin e tij. Përderisa kemi lindur këtu, Zoti na ka caktuar kujdestarë të këtij vendi dhe kemi përgjegjësi përpara Perëndisë për mbarëvajtjen e tij, sepse 'i Zotit është dheu dhe gjithçka që është në të' - thotë Psalmisti.

Gjë që do të thotë se pjesë të dheut, që na ka caktuar neve që kemi lindur këtu, e kemi detyrim për ta dashur, e kemi detyrim për ta begatuar dhe kemi detyrim që ky vend të përparojë e të ndriçojë. Kjo është atdhedashuria e vërtetë. Njerëzit duhet ta duan vendin e tyre, sepse nëse nuk do të duan vendin e tyre, padyshim që nuk do të duan as Perëndinë.

Si thotë Shën Joani në letrat e tij (1Jn.4:20) se ai njeri që thotë dua Perëndinë dhe urren vëllanë e tij, është gënjeshtar; sepse si do të duash Perëndinë që nuk e ke parë asnjëherë dhe nuk do vëllain tënd që e shikon çdo ditë?! Ne këtu çdo ditë shikojmë bashkatdhetarët tanë, vëllezërit tanë dhe nëse nuk i duam ata, padyshim që nuk duam as Zotin. Prandaj dhe kisha e nxit atdhedashurinë, si pjesë të rëndësishme të jetës fetare”, ka thënë Kryepiskopi Joan./ CNA





Lajmet e fundit nga