Policia rendit shkeljet e Ajas Sulejmanit/ I proceduar para 3 javësh, i ndëshkuar 8 herë në rrugë

8 Maj 2022, 15:17, Kronika CNA

Policia e Shtetit ka reaguar me një informacion zyrtar në lidhje me aksidnetin e sotëm në rrugën e Kavajës, në Tiranë, ku u përplas një çift me një fëmijë 3 muajsh.

Blutë raportojnë se drejtuesi i makinës luksoze, Ajas Sulejmani, është lokalizuar në një spital privat, dhe më pas u shoqërua në ambientet e Komisariatit të Policisë Nr. 2 dhe u bë arrestimi i tij.

Sipas informacionit, autori i aksidentit është proceduar penalisht tri javë më parë për shkeljen e dispozitave të Kodit Rrugor dhe është shoqëruar për verifikim nga strukturat e Trafiqeve të Paligjshme.

Policia deklaron se Sulejmani është ndëshkuar 8 herë nga efektivët e Komisariatit Rajonal të Policisë Rrugore Tiranë, nga të cilat disa herë për shkelje të sinjalizimit rrugor, shkelje semafori dhe mospërdorim të rripit të sigurimit.

Gjithashtu, ai është ndëshkuar disa herë me bllokues gomash, për shkak të parkimeve në shkelje të rregullave të qarkullimit rrugor në rrugët e kryeqytetit.

?Në lidhje me aksidentin e ndodhur në Rrugën e Kavajës, ku një automjet me targa të huaja aksidentoi një çift dhe fëmijën e tyre të vogël, dhe më pas u largua nga vendi i ngjarjes, ju informojmë se:

Pas një pune intensive hetimore, u bë i mundur lokalizimi i shtetasit A. S., në një spital privat, dhe më pas shoqërimi i tij në ambientet e Komisariatit të Policisë Nr. 2 dhe arrestimi i tij.

Drejtuesi i automjetit me targa të huaja, shtetasi me iniciale A. S., 39 vjeç, i dyshuar si autori që shkaktoi aksidentin me këmbësorët, në Rrugën e Kavajës, është ndëshkuar 8 herë nga efektivet e Komisariatit Rajonal të Policisë Rrugore Tiranë, nga të cilat disa herë për shkelje të sinjalizimit rrugor, shkelje semafori dhe mospërdorim të rripit të sigurimit.

Gjithashtu, ky shtetas është ndëshkuar disa herë, me bllokues gomash, për shkak të parkimeve në shkelje të rregullave të qarkullimit rrugor në rrugët e kryeqytetit.

Po ky shtetas është shoqërur tre javë më parë në ambientet e Komisariatit Rajonal të Policisë Rrugore Tiranë, po me këtë automjet, për verifikim nga strukturat e Trafiqeve të Paligjshme në Drejtorinë Vendore të Policisë Tiranë, dhe pasi është verifikuar, është proceduar për shkeljen e dispozitave të Kodit Rrugor?, thuhet në njoftimin e policisë.

Sakaq, grupi hetimor vijon punën për dokumentimin e plotë të rrethanave të ngjarjes./ CNA.al