“Ardhja e vaksinave në ditën e fushatës”/ Erion Dasho 'kap mat' Ramën, 6 pyetje që duan përgjigje

25 Mars 2021, 15:39, Politikë CNA

Eksperti i Shëndeti Publik, Erion Dasho ka dalë me një reagim në rrjetet sociale, menjëherë pas fjalës së mbajtur të kryeministrit Rama në Rinas me ardhjen e 192 mijë vaksinave kineze.

Dasho shkruan se ardhja e vaksinave kineze nëpërmjet ndërmjetësimit të një firme turke në ditën e parë të fushatës elektorale hap një sërë pikëpyetjesh të karakterit teknik dhe ligjor.

?Sot u siguruan një sasi e konsiderueshme vaksinash kundër Covid-it. Kjo është një lëvizje që duhet përshëndetur, sepse vaksina është mjeti kryesor (sigurisht jo i vetmi) që disponohet në përpjekje për të kontrolluar virusin.

Por, dardha e ka bishtin prapa. Ardhja e vaksinave kineze nëpërmjet ndërmjetësimit të një firme turke në ditën e parë të fushatës elektorale hap një sërë pikëpyetjesh të karakterit teknik dhe ligjor.

Pikëpyetje të karakterit teknik

Pse nuk u prit çertifikimi i EMA-s siç ishte deklaruar disa herë në muajt e kaluar?

Pse këto vaksina nuk u kontraktuan direkt nga Kina, por po sillen nëpërmjet Turqisë?

A është në dijeni qeveria dhe komitetet se Turqia është një nga vendet e dizenjuara si prodhues dhe eksportues të medikamenteve të falsifikuara, sidomos për mallrat që kanë destinacion tregun europian?

Pikëpyetje të karakterit ligjor

A është shkelur ligji shqiptar mbi medikamentet dhe produktet biologjike në këtë rast?

Përse nuk u botua justifikimi teknik i komitetit të ekspertëve ose komitetit të vaksinimit për ndryshimin e akteve ligjore?

Në garën e ethshme botërore për vaksina, cili është cmimi real dhe “çmimi” gjeopolitik që është paguar për vaksinat kineze?

Dhe mbi të gjitha:

A mund të jetë koincidencë ardhja e vaksinave pikërisht ditën kur nis fushata elektorale?

A ka patur një ofertë nga Turqia për të dhuruar vaksina që në muajin janar?

A ka patur oferta të tjera për të sjellë vaksina perëndimore shumë javë më parë se sot, atëherë kur administrimi i tyre do të kishte shpëtuar qindra apo mijëra jetë?

Duke ju gëzuar vaksinave të ardhura sot dhe duke pritur të shohim në veprim logjistikën e nevojshme për t’i dërguar ato tek qytetarët në nevojë, sigurisht që do të analizojmë situatën me përgjegjshmëri dhe në detaje për tu dhënë përgjigje të gjithë dyshimeve të mësipërme.

Qytetarët kanë të drejtë për transparencë.”, shkruan ai./CNA.al