E fundit!

12:23 Aktualitet

Ja kush e merr drejtimin e Policisë së Vlorës

Edvin Ndreu, i renditur me 84 pikë në garën për drejtoritë...

Ndeshja e fundit e Muçit me fanellën e Tiranës, ja ku do të transferohet talenti bardheblu

31 Janar 2021, 10:49, Sport CNA

Ditë vendimtare për të ardhmen e Ernest Muçit. Sulmuesi mund të ndërrojë kampionat në këtë merkato janari, por me shumë mundësi gjithçka do të vendoset në 24 orët e ardhshme, për të mos thënë pak orë para sfidës me Apoloninë. Tirana duhet të vendosë se çfarë do të bëjë, nëse do të pranojë apo jo 600 mijë eurot që ka në tavolinë.

Fakt është se në Zvicër, merkatoja mbyllet më datë 15 shkurt dhe oferta e Jang Bojsit është e vlefshme deri në atë ditë. Bardheblutë kanë kohë deri pas janarit për ta shitur si në Austri dhe Zvicër apo te skuadrat nordike që kampionatin e nisin më vonë. Ernest Muçi kërkohet nga Rapidi i Vjenës dhe emri i tij është në listën e dëshirave të klubit austriak i cili ka kohë deri më 8 shkurt të marrë një vendim përfundimtar.

Lajmi konfirmohet nga burime pranë lojtarit, por edhe klubit bardheblu. Menaxheri i lojtarit po punon që të çojë futbollistin në një skuadër të madhe dhe në skenë ka dalë Rapidi. Ernest Muçi mund të kalojë tek austriakët ose të paktën kështu përflitet në ambientin bardheblu. Burime të konfirmuara bëjnë me dije se lojtari i sulmit është pëlqyer nga drejtuesit e skuadrës së huaj, të cilët po e ndjekin prej kohësh. Thuhet se Tiranës për lojtarin i janë afruar rreth 450 mijë euro. Një shumë e madhe, në krahasim me të gjitha ofertat që u kanë ardhur bardhebluve në tavolinë. Bardheblutë nuk e kanë pëlqyer këtë ofertë, sepse duan më shumë para dhe një pjesë të mirë të kartonit.

Tirana kërkon mbi 700 mijë euro. Burimet pohojnë zyrtarisht se janë edhe skuadra të tjera që kërkojnë Muçin, por ende nuk ka një vendim zyrtar për çështjen nëse do të largohet apo jo këtë janar nga Tirana. Më parë për sulmuesin kanë ardhur oferta nga Suedia prej Hamarbit, Zvicra Jang Bojs dhe Zyrihu, nga Kroacia prej Osijekut dhe nga Turqia prej Samsunsporit, por Tirana kërkon të marrë maksimumin nga talenti që ka në ekip. Vetëm nga periudha e formimit bardheblutë i kanë të sigurta 200 mijë euro, gjithmonë nëse shkon në një skuadër të madhe.