Arbitri tregon dhunën e ushtruar në ndeshjen Delvina-Albetroli

21 Dhjetor 2020, 20:44, Sport CNA

Rikthehet dhuna në fu tbollin shqiptar! Një arbitër anësor nga Vlora e pëson në ndeshjen Delvina-Albpetroli, e cila u luajt vetëm 12 minuta të shtunën në stadiumin ?Panajot Pano? të qytetit jugor. Takimi i vlefshëm për javën e 7-të të Grupit B të Kategorisë së Dytë nisi normalisht, derisa në zhvillimet e një aksioni të patosarakëve, anësori Elis Pulaj sinjalizon goditje këndi për Albpetrolin, duke qenë në unison me vendimin e kryesorit Ermis Çelaj.

Pa u goditur ende kornia, një tifoz kapërcen rrethimin e fushës dhe i afrohet anësorit të dytë, Pulaj. Bëhet fjalë për minutën e 12-të, kur tifozi, i identifikuar nga policia me inicialet A.H., qëllon me grusht në vetullën e syrit të majtë arbitrin vlonjat. Vetëm pak sekonda përpara këtij incidenti, një gur kishte prekur kokën e arbitrit. Këtu ndërhynë menjëherë lojtarët e dy ekipeve dhe stafet respektive për të qetësuar situatën, teksa tifozi u largua.

Mjeku i ekipit të Delvinës i dha ndihmën e parë arbitrit, që më pas me ndihmën e kolegëve të tij udhëtoi drejt Sarandës për të marrë mjekim të plotë në spital. Arbitri kryesor, bashkë me delegatin e ndeshjes dhe vëzhguesin vendosën që të përfundonte takimi pas vetëm 12 minutash. Edhe ky moment nuk kaloi pa incidente, me zyrtarët e ndeshjes që u ndien të kërcënuar nga vendësit, të cilët pretendonin se takimi duhet të vazhdonte.

?MË GODITËN KUR ISHA ME KURRIZ?

?Panorama Sport? zbardh ekskluzivisht dëshminë e arbitrit nga Vlora, Elis Pulaj, në polici. ?Jam goditur nga një tifoz. Ai më erdhi nga pjesa mbrapa dhe unë nuk e vura re. Fillimisht qëlluan me gur gjatë zhvillimit të ndeshjes. Pastaj u fut në fushë njëri nga tifozët, duke më qëlluar mua në mënyrë të drejtpërdrejtë. Unë isha me kurriz dhe nuk e pashë.

Në këto kushte nuk kisha asnjë mënyrë apo mundësi që të reagoja për t?u mbrojtur. Tifozi më erdhi nga mbrapa, ndërsa unë isha duke bërë detyrën time. Ai u fut në fushë dhe më gjuajti. Në një moment ndjeva një goditje të fortë që për pak më la pa ndjenja. Nuk po e kuptoja nga më erdhi dhe çfarë po ndodhte. Goditja ishte e fuqishme në pjesën e kokës. Në atë moment m?u errën sytë. Më vonë, pasi kaloi pak nga ngjarja, ndjeva dhembje në pjesën e ballit dhe afër syrit. Nuk di të them se përse u sulmova. Ajo çfarë mund të deklaroj me përgjegjësi është se e gjitha kjo nuk kishte lidhje fare me ndeshjen. Ndeshja ishte shumë normale.

Nuk e njoh fare atë person dhe për më tepër nuk kisha debatuar me ndonjë para fillimit të takimit apo të kisha lënë ndonjë shkak që të më kundërviheshin, pasi takimi po ecte mirë?, është shprehur në deklaratën e tij në polici arbitri Pulaj. Ndërkaq, burime nga policia thanë për ?Panorama Sport? se arbitri ishte në gjendje të rënduar emocionale në momentet e para, për shkak të ngjarjes së ndodhur. Po ashtu edhe gjyqtarët e tjerë të takimit, kolegët e tij ishin mjaft të trembur nga ajo çfarë kishte ndodhur. Pasi denoncuan rastin, treshja e arbitrave nga Vlora i kanë kërkuar policisë që të zbardhë ngjarjen dhe autori të vihet përpara drejtësisë.