web counter
LEXO PA REKLAMA!

SHKARKO APP

App Store
Google Play

Krahasimi i renditjeve/ Skënderbeu e Bylis përgjysmohen

21 Dhjetor 2020, 19:42, Sport CNA

Kategoria Superiore nis këtë të mërkurë fazën e dytë të saj, por ndërkohë i ka dhënë fund xhiros së parë të ndeshjeve për ekipet të cilat mund të bëjnë edhe bilancin fillestar të përballjes me të gjithë të tjerët. Pas 9 ndeshjesh, krahasuar me një vit më parë, rezulton se vetëm tre ekipe kanë përmirësuar bilancin e pikëve të siguruara në kampionat.

E para është Vllaznia kryesuese, me 4 pikë më shumë se një vit më parë, duke kaluar nga 15 në 19 pikë. Shkodranët cilësoheshin në garë për Europën edhe në vitin e kaluar ndaj tani që janë përmirësuar, me të drejtë shohin ndoshta edhe për diçka më shumë.

Ekipi i dytë i përmirësuar, pavarësisht humbjes së fundit, është Kukësi, verilindorët kanë kaluar nga 14 pikët e edicionit të kaluar në 16 pikët e këtij aktual. Ndërkohë, vetëm 1 pikë më shumë regjistron Laçi, me 11 të tilla ndaj 10 të edicionit të kaluar.

Më pas, fillon lista e ekipeve që kanë humbur terren në krahasim me sezonin e kaluar. Tirana ka një pikë më pak, ndërsa Teuta regjistron që tani 2 pikë më pak se një edicion më parë. Bilanci i Partizanit sheh të kuqtë me 4 pikë më pak se një vit më parë, ndërsa dy skuadrat e tjera të mbijetuara nga edicioni i mëparshëm kanë përgjysmuar pikët e tyre. Skënderbeu ka vetëm 6 pikë në krahasim me 13 të një viti më parë. Ndërsa Bylisi ka gjysmën e vitit të kaluar, pasi regjistron 8 të tilla ndaj 16 që kishte pas javës së 9 në edicionin e kthimit në Superiore.





Lajmet e fundit nga