Shoqet e ministrisë na njoftuan që Turi qenka hedhur djathtas

14 Qershor 2020, 08:24, Opinione CNA

Mbrëmë më në fund shoqet e shoqes Besa, na njoftuan që përgjigja e saktë për pyetjen e famshme të personazhit heroik Turi, është opsioni D):

“Turi u hodh në të djathtë për të shmangur shkëmbin dhe gati përmbysi barkën.”
Tani këtu hapen disa diskutime të tjera, po aq të rëndësishme për fatin e Turit.
Së pari, teksti i dhënë në tezë, pra paragrafi dramatik përshkruan një Turi që vështron skajet e mprehta të një shkëmbi të dhëmbëzuar që shfaqet PËRPARA!

Pak përpara se Turi të kishte parë shkëmbin, autori na sqaron që Turit sapo i kishte dalë frika.
Ndaj në këtë pikë do ishte më e udhës që shoqet e shoqes Besa të kishin zgjedhur që Turi pasi kaloi frikën të zgjidhte opsionin A), domethënë të përpiqej të kujtonte procedurën e saktë për të kthyer barkën në pozicion të sigurtë.
Por edhe opsioni B) dukej më i përshtatshëm sesa opsioni D). Në fund të fundit të zgjedhësh opsionin që sugjeron që uji i ftohtë bënte qull Turin dhe të tjerët, kur je në mes të lumit të rrëmbyer, duket e logjikshme.
Bilè, pasi ishte qetësuar nga frikërat e fillimit, edhe opsioni C) do ishte më i logjikshëm sesa ai që qenkësh destinuar për heroin tonë.

E marrim pak më me qetësi!

Shkëmbi kishte dalë PËRPARA.
Pse Turi u hodh në të djathtë?
Epo nëse shkëmbi do kishte dalë majtas, do justifikohej kërcimi i Turit djathtas, apo jo? Por ai dreq shkëmbi nuk ishte majtas! Ishte përballë? Pse Turi nuk u rras në fund të barkës? Instinkti të detyron t?i largohesh rrezikut.
Shoqet e shoqes Besa, pas 3 ditëve të provimit, vendosën që Turin ta kërcejnë djathtas.

Bilè përveçse e hedhin djathtas, zgjedhin ekzaktësisht opsionin që rrezikon edhe përmbysjen e barkës. Dhe pas kësaj në lojë nuk është vetëm fati i Turit, por edhe i shoqnis Turit!
A mos vallë në fund zgjodhën opsionin D) për të na kujtuar që nuk ishte veç Turi në rrezik e se ne kishim harruar që edhe ata të tjerët në fund të fundit ishin bij nënash. Për të cilët as që ka pyetur njeri këto 3 ditë!!!??
Pse shoqet e shoqes Besa, vendosën që Turi duhet të hidhet djathtas?

Në fakt kërcimet djathtas ose majtas, duken edhe më të rrezikshmit për një barkë me njerëz, me një shkëmb përpara mes ujit të rrëmbyer! Çfarë duan të thonë shoqet e shoqes Besa me vendimin që morën që të zgjedhin hedhjen e Turit djathtas?
Duan të na thonë mos u merrni më me Turin se ai është thjesht një kokërr budallai që bëri tamam atë që s’duhej?

Po pse djathtas?

Se budalla siç qenka, ato mundet që kur shkruan pyetjet të kishin vendosur që Turi të hidhej majtas!
Por jo!
E hodhën djathtas! Dhe kjo zgjedhje nuk duket fare pa kuptim. Duket se duan të na kujtojnë diçka shoqet e shoqes Besa!
Ne mbase nuk do e mësojmë kurrë nëse Turi doli i gjallë nga lumi.
Por nga shoqet e shoqes Besa u njoftuam që ndërsa ishte në lumë, e mbase në ditën më të keqe të jetës së vet, Turi u hodh në të djathtë. Këtë vendosën si zgjidhje për fatin e Turit shoqet e shoqes Besa. 3 ditë pas provimit dhe dy ditë pas protestave të maturantëve. Nese gjithë kjo histori nuk do ishte kaq idiote, do dukej si mesazh. Dhe e fundit: Po letërsia si u gjend te barka Turit?/CNA.al