“Zgjedhorja”/ Ilva Tare: Reforma e duhur, demokracia e partive

4 Qershor 2020, 21:12, Opinione CNA

Prej një jave publiku është bombarduar nga lajmet për Reformën Zgjedhore. Duket sikur u harrua corona, tërmeti, vaksina, komplotet e konspiracionet. Aman të bëhet reforma zgjedhore që të plotësohet kushti i Brukselit për hapjen e negociatave. Por, sa i hyn në punë vërtet publikut reforma elektorale? Pa reformim të partive politike, demokracinë e tyre të brendshme dhe politikanëve në vend, çdo marrëveshje për reformë është riciklim i krizave dhe huqeve të vjetra.

Pavarësisht se është për t?u lavdëruar durimi i Washington Dc, Brukselit, i Berlinit politika shqiptare në dekadën e katërt të post komunizmit duhet pranuar se ka dështuar. Dhe ashtu si fëmijët në këndin e lojërave, politikanët nuk arrijnë të vendosin rregullat e lojës. Ashtu siç kanë eliminuar në partitë e tyre garën e brendshme dhe mendimin kritik, tanimë duan të negociojnë për fitore në tavolinë dhe të asgjësojnë fjalën garë. Po ku ka garë në Shqipëri? Thuajse për asgjë. Çdo garë politike, artistike, sportive, intelektuale, provohet se në mos është e shitur, është e blerë ose fiktive.

Politika po lufton për një garë, e cila që në fillimin e saj, është e vdekur. Ne nuk dimë të bëjmë garë. Politikanët me sjellje dhe qëndrim në politikë më jetëgjatë se imagjinata nuk dinë dhe nuk duan të bëjnë garë.

A siguron garë një marrëveshje për këtë reformë zgjedhore? JO. Palët kërkojnë garanci për të ruajtur njëra-tjetrën se mos vjedhin vota? Kjo është fyese për gjithë popullin shqiptar. Do monitorojnë qendrat e votimit? Do hapin listat? Po edhe sikur të hapin listat apo të ndryshojnë sistemin zgjedhor, as kjo nuk është garë. Garë është kur qytetari zgjedh se kë të votojë, kur partitë nuk kanë listat e atyre që detyrojnë të votojnë. Garë është kur brenda vetë partive një anëtar i thjeshtë kërkon llogari, jo tek kryetari, por tek ai që ka zgjedhur ta përfaqësojë.

Garë është kur një forcë e majtë është e majtë, një forcë e djathtë është e djathtë dhe të dyja janë për popullin. Garë është kur fjala ka fuqinë të skuqë faqen e atij që nuk e mban. Garë është kur partia politike të reformohet, hapet, bëhet e konkurrueshme.

Politika po e gdhin në rezidencën e ambasadës amerikane dhe e ngrys në zyrat e partisë ku me tone të larta refuzohet firmosja e marrëveshjes. Pakkush po flet për cilësinë e reformës, sepse askush nuk e do me të vërtetë dhe nuk sheh ndonjë përfitim prej saj. Shihet më së shumti si një kuti që duhet plotësuar për Brukselin, Bundestagun dhe ambasadën amerikane. Ah, po dhe për hapjen e negociatave që mezi priten nga qytetarët shqiptarë./Euronews Albania