E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Nga Bledi Mane/ Kitara e ndryshkur e Aleksandër Gjokës

28 Maj 2020, 09:35, Opinione CNA

1. Parmbrëmë pak pas mesnate, Sali Berisha u zgjua nga gjumi qullë në djersë. Ca prej një ëndrre acaruese që po shikonte me artistë, ca prej shurrës cinike të moshës. Vërdhoi drejt banjës, shurroi nxitimthi dhe shkoi të merrte celularin. Ashtu me brekët e qullura nëpër këmbë nuk shkoi në krevat të shikonte vazhdimin e ëndrrës por sërish në halé, ndezi telefonin dhe filloi të filmonte veten:

-O Aleksandër Gjoka, çfarë të duket vetja ty që ke 40 vjet e po na çan trapin? 10 vjet duke kënduar fshuhurazi “këngë italiane dashnie” nëpër shkurret e Liqenit, 30 vjet na shfaqesh në radio, televizione, sheshe qytetesh, kasetofona makinash, mitingje elektorale, internet, festivale duke u çjerrë për ndjenjat, beqaret, zemrat e thyera, dallgët e detit…

2. Mëse e vërtetë është llogaritja e këtyre hespave.
40 vjet ka Aleksandër Gjoka që nuk i ndahet skenës,
36 vjet ka Adi Krasta dhe Reiz Çiço që nuk zhduken nga ekranet,
34 vjet ka Gramoz Ruçi që nuk i ndahet politikës,
26 vjet ka Bleona Qerreti që ka pronësuar industrinë e tallavasë,
29 vjet ka Sali Berisha, Ilir Meta dhe Pandeli Majko në frontin e parë të politikës,
20 vjet Armand Duka në drejtimin e futbollit shqiptar,
22 vjet Edi Rama nuk i ndahet pushtetit,
22 vjet edhe Sinan Hoxha që u këndon dhëndurëve,
25 vjet Shezai Rrokaj dhe Mynyr Koni në drejtimin e universiteteve publike,
29 vjet që kanë rrëmbyer tregun mediatik Blendi Fevziu, Mero Baze, Andi Bushati, Andi Bejtja, Armand Shkullaku, Ylli Rakipi…

E nëse e keni parë edhe ju videoselfien ku këngëtari Sandër Gjoka shfryn e shan pa doganë establishmentin politik të Tiranës jepini të drejtë artistit. Nuk është duhmë e bajatosjes që na ka shpifur politika dhe media këto 30 vjet por është klithma e konkurencës mes tyre.

Arti kundër politikës në rrëmbimin dhe përvetësimin jo vetëm të vëmendjes por edhe të parasë publike. Këtu tek ne artistët dhe gazetarët bëjnë politikë ndërsa politika i këndon tallava miletit çdo ditë. Ndaj sheshet e mitingjeve elektorale janë plot dhe sallat e teatrit dhe koncertit mbeten bosh. Gjithësesi mos u shqetësoni kur i bërë dru me alkool ulëret Sandër Gjoka. Ka edhe pak aktrim brenda asaj klithme. Duket sikur acarohen por në të vërtetë ia shkelin njëri-tjetrit syrin. Sa herë ndihen të rrezikuar bëhen bashkë edhe arti, edhe politika. Duan të mbeten përjetësisht në skenë të dyja palët pa ia hapur rrugën këngëtarit të ri, politikës së re.

Pasi të lexoni këtë shkrim, u pres te lokali i lagjes dhe bëhemi dru me raki. Pastaj bëjmë edhe ne një video. Shajmë politikën, shajmë artin, shajmë edhe veten tonë!