E fundit!

21:40 Denoncim

Një vit pritje për 3 milionë borxh, çfarë ndodhi pas ndërhyrjes së “Stop”

Rasti i radhës i transmetuar në emisionin “Stop”, këtë të ...

Pse PD kërkon Gjykatën Kushtetuese për çështjet zgjedhore?

30 Maj 2020, 14:45, Politikë CNA

Reforma Zgjedhore duket se do bëhet.

Por përfaqësuesit e palëve në Këshillin Politik do duhet të strapacohen si gjithmonë deri në sekondat e fundit.

Pas 3 vjetësh duke bërë tekanjozin dhe luajtur rolet që tashmë shqiptarët ua njofin mirë, duket se ditët në vijim do startojnë miratimin e një Kodi të ri Zgjedhor.

Në këtë pikë nuk ka dilema, sa kohë ashtu si me Reformën në Drejtësi, ambasadoret po rrinë gjithë ditën me mesazhe gati.

Por siç ka bërë sistematikisht në këto vite opozite, PD vazhdon të sajojë propozime edhe për Kodin e ri Zgjedhor deri sekondën e fundit.

Për shqyrtimet e mosmarrëveshjeve zgjedhore, PD kishte kërkuar Kolegj Zgjedhor me gjyqtarë për të cilët të ndërpritej proçesi i vlerësimit kalimtar. PS deklaroi që është e hapur dhe pranon pa asnjë rezervë që çështjet zgjedhore të shqyrtohen nga Kolegji Zgjedhor, por PS nuk pranonte në asnjë rast që anëtarët e Kolegjit Zgjedhor të ishin gjyqtarë të pavetuar.

PD që nuk mundet me sa duket ta kundërshtonte parimisht këtë përgjigje, dje kur ka kaluar muaji nga dorëzimi i propozimeve të opozitës për çështjet e Kodit Zgjedhor, dorëzon një opsion surprizë.

PD nga dje po kërkon që çështjet zgjedhore të shqyrtohen nga Gjykata Kushtetuese.

Ne mund ta kuptojmë dilemën e PD për anëtarë kolegji zgjedhor të vetuar, sa kohë akuzat e opozitës kanë qënë që proçesi i Vetingut kontrollohet nga Rama. Mund ta kuptojmë që me këtë logjikë një Kolegj Zgjedhor i vetuar nga Rama, do të thotë në analizën e PD, i kontrolluar nga Rama.

Por Gjykata Kushtetuese nga kush kontrollohet?

Me pesë anëtarë të caktuar tashmë dhe katër të tjerë për të cilët nuk dihen ende emrat, pse PD qenka sot e qetë nga dyshimet për të ardhmen?

Tre anëtare të Gjykatës Kushtetuese priten të përzgjidhen dhe propozohen nga Gjykata e Lartë.

Atje ku janë përfunduar në fakt proçedurat e dekretimit nga Meta për tre gjyqtarë dhe vazhdon sherri i Metës me njërin prej tyre.

Por duket se dikush në opozitë di diçka që ne nuk e dimë.

Ato tre vende në Gjykatën Kushtetuese mbase i janë lënë opozitës! Dhe në emër të opozitës për ato tre vende mund të garantojë vetëm Presidenti Meta.

Marrëveshja me sa duket ka mbaruar.

Por këtë me shumë gjasë nuk e dinë ende Gjiknuri me Bylykbashin!

Ata duhet të rrinë edhe nja tre net pa gjumë. Ky është roli që u është caktuar./ CNA.al