E fundit!

11:39 Aktualitet

Rama ka ndërhyrë për Ballukun?/ Braho-opozitës: Paraqitini provat në SPAK

Deputetja Elda Hoti në Komisionin për Nismat Qytetare ka d...

UGJSH denoncon me dokumenta/ Gazetari përfundon i pandehur nga disa efektivë se i zbuloi shkeljet

22 Prill 2020, 18:51, Denoncim CNA

Unioni i Gazetarëve Shqiptarë ka denoncuar mbrëmjen e sotme rastin e një gazetari shqiptar që ka përfunduar si i pandehur përballë një procesi gjyqësor me efektivë të Policisë së Shtetit dhe prokurorisë lokale

Unioni bën me dije se Gjykata e Fierit në datën 15.04.2020 i ka paraqitur gazetarit Vladimir Muçaj, Fletë-thirrjen për t’u paraqitur në datën 27.04 2020 për dëgjesë në cilësinë e të pandehurit në çështjen me kërkues: Prokuroria Fier me objekt dërgim i çështjes për gjykim.

UGSH ka publikuar disa dokumenta, me të cilat pretendon se kuptohet se si një reporter nga denoncues mund të përfundojë në i pandehur nga organet e rendit dhe drejtësisë në këtë vend.

“Kohë më parë, reporteri Vladimir Muçaj, njeherësh kryetar i Unionit të Gazetarëve Shqiptarë për Qarkun Fier, kishte denoncuar pranë autoriteteve policore të qarkut Fier dhe ministrit të Brendshëm zotit Sandër Lleshaj, shoqërimin për disa orë në komisariat dhe shkeljet e procedurave nga punonjës së Patrullës së Komisariatit, Fier. Ankesa dhe denoncimi i gazetarit shkaktuan reagimin institucional të ministrit dhe të institucionit të Kontrollit të Brendshëm. Kolegu ynë reagimet e veta publike i vijoi duke shprehur ankesa të adresuara, për sjelljet dhe shkeljet e punonjësve të policisë ndaj tij. Në letrën e përgjigjes që merr nga drejtori i Shërbimit të Kontrollit të Brendshëm, me firmë dhe vulë, zoti M. Rrumbullaku konfirmohen shkeljet proceduriale si dhe bëhet i njohur njoftimi për propozime masash ndaj punonjësve të Patrullës që kanë të bëjnë me rastin, nga Drejtoria e Standarteve në Policinë e Shtetit.

Por mesa duket, vullneti për të pasur një gazetar të pandehur, paska qenë i pandalshëm për organin e Policisë lokale dhe Prokurorinë e Fierit. Me bindje kanë nisur një proces dhe e kanë sjellë atë në gjykatë duke mos patur asnjë stepje përballë realitetit absurd të kthimit të denoncuesit në të pandehur. Unioni i Gazetarëve Shqiptarë e denoncon këtë proces gjyqësor të nisur ndaj gazetarit dhe kryetarit të UGSH-së në qarkun Fier, si një akt të paprecedent dhe si një proces kundër gazetarëve në përgjithësi”, thuhet në deklaratë.

Unioni i Gazetarëve Shqiptarë konfirmon publikisht ndjekjen dhe përfshirjen në monitorim të të gjitha hapave të këtij procesi të montuar ndaj gazetarit, ndërsa bën me dije se në seancën gjyqësoredrejtues dhe përfaqësues të organizatës do të jenë prezentë./ CNA.al