web counter
LEXO PA REKLAMA!

SHKARKO APP

App Store
Google Play

Ndërroi jetë ish kreu i OKB-së që vizitoi Shqipërinë në vitin 1990

5 Mars 2020, 18:46, Kosova & Bota CNA

Javier Perez de Cuellar, diplomati peruan që ndërmjetësoi shumë marrëveshje paqeje në botë gjatë mandatit të tij si sekretar i Përgjithshëm i Kombeve të Bashkuara në vitet 1980 dhe 90, ka ndërruar jetë sot, në moshën 100-vjeçare .

Ndër të tjera, sipas radios amerikane VOA, ai do të mbahet mend gjithashtu për vizitën që bëri në Shqipëri në maj të vitit 1990, kur vendi ende nuk kishte dalë nga izolimi komunist. Në atë kohë, ai ishte zyrtari i parë i lartë i huaj që vizitonte Shqipërinë prej disa dekadash.

Gjatë vizitës, Perez de Cuellar kritikoi sistemin një partiak të Shqipërisë ndërkohë që udhëheqësit e atëhershëm komunistë nuk e lejonin krijimin e partive opozitare.

Nën trysninë e zotit De Cuellar dhe atë ndërkombëtare, udhëheqësit e Shqipërisë më në fund premtuan lirimin e të burgosurve politikë dhe rihapjen e objekteve të kultit që kishin qëndruar të mbyllura nën regjimin komunist.

De Cuellar, i lindur në Peru, u zgjodh në krye të OKB-së në vitin 1981 dhe ishte latinoamerikani i parë që drejtonte organizatën botërore.

Ai ndërmjetësoi për zgjidhjen e konflikteve në Kamboxhia, Nikaragua si dhe atë në El Salvador, deri në ditën e tij të fundit në detyrë më 31 dhjetor 1991.

Sekretari i Përgjithshëm aktual i OKB-së Antonio Guterres vlerësoi paraardhësin e tij si “një burrë shteti i suksesshëm, diplomat i përkushtuar dhe një frymëzim për atë vetë.? De Cuellar, tha ai lë pas një ndikim të thellë në Kombet e Bashkuara dhe në botë.





Lajmet e fundit nga