Skandali me “Dosjen Çili”/ Dvorani sqaron rolin e Dvoranit

2 Mars 2020, 12:58, Politikë CNA

Katër ditë më parë, arrestimi i pronarit të UET, Henri Çili bëri bujë të madhe në media. Arrestimi i tij u bë në kuadër të operacionit ?Mezhgorani?, i cila çoi në pranga gati 40 persona.

E gjithë vëmendja mediatike por edhe e politikës u përqëndrua tek arrestimi i Henri Çilit, fajësia apo pafajësia e tij, por u la në heshtje një tjetër detaj.

Në lidhje me këtë dosje, del dhe një zyrtar i lartë i drejtësisë, tek i cili pretendohet se Henri Çili do të ushtronte ndikimin për të liruar apo ulur dënimin e një të dënuari me burgim të përjetshëm.

As policia dhe as prokuroria nuk dhanë asnjë informacion apo të dhënë se kush është personi në fjalë, apo pse nuk u arrestua ai.

Por, sipas të gjithë hetimit dhe publikimit në media ai është Ardian Dvorani, kreu i KED dhe i vetmi person që vazhdon detyrën në Gjykatën e Lartë.

Ka pasur shumë akuza për qëndrimin e tij në detyrë dhe mënyrën sesi ai e kaloi vettingun, ndërkohë që shumë kolegë të tij në gjyqësor dhe Prokurori e ?pësuan? për gjysmën e problematikave që kishte Dvorani.

Vetë Dvorani në një qëndrim për mediat, ditën e arrestimit të Henri Çilit, e pranoi se e njihte këtë të fundit, por tha se nuk kishte asnjë kontakt me të, duke ?harruar? se djali i tij ka studiuar pikërisht në UET-in e Henri Çilit.

Por, ndërkohë sot ka pasur një tjetër reagim, që në media u shit se ?Reagim i Gjykatës së Lartë?.

Në një deklaratë për mediat, Gjykata e Lartë, ndërsa tenton të sqarojë opinionin në lidhje me çështjen në fjalë, shprehet se ?gjykata dhe prokuroria po kryejnë dhe duhet të kryejnë detyrat e tyre deri në fund edhe në këtë drejtim, duke ripërsëritur se në mënyrë kategorike nuk ka pasur asnjë lloj kontakti, të çfarëdo natyre dhe me çfarëdo personi, të gjyqtarit Ardian Dvorani, lidhur me çfarëdo çështjeje gjyqësore, përfshirë edhe çështjen penale nr. 52105-00941-00-2019?.

Pra, vetë Dvorani shpjegon përfshirjen e Dvoranit në çështjen në fjalë.

Nëse akuzat se do të kishte një ndërhyrje për lirimin e të arrestuarit Arbjon Aliko janë të vërteta, do të thotë që ndërhyrja do bëhej në Gjykatën e Lartë, pikërisht aty ku bëhet rekursi i tij. Anëtar, dhe kryetar i vetëm i Gjykatës së Lartë, deri në këto momenti është vetëm Ardian Dvorani.

Por, sërish është po ky Dvoran, që sqaron opinionin për përfshirjen e Dvoranit në dosjen e bujshme.

Mesa duket Ardian Dvorani, e paska ?pasion? të shesë veten një herë si KED, një herë si Gjykata e Lartë. Sigurisht gjithçka në varësi të interesit të momentit./ CNA.al

Operacioni ku u arrestua Henri Çili/ Gjykata e Lartë shpjegon përfshirjen e Dvoranit në këtë ngjarje

Skandali i ?Dosjes Çili?/ Pse nuk arrestohet zyrtari i lartë i drejtësisë?