Shembja e objekteve në Durrës/ Po zhduken provat e krimit

1 Dhjetor 2019, 13:15, Politikë CNA

Ka filluar në Thumanë, në Durrës shembja e disa objekteve të cilat janë të pabanueshme.

Pavarësisht kësaj situate emergjente edhe pse këto objekte përbëjnë rrezik për banorët që i kanë në pronësi, ato nuk duhet të shemben.

Objektet duhet të rrethohen dhe të ruhen nga policia, asnjë banor nuk duhet të lejohet të hyjë, por nuk mund të ndodhë shembja pa marrë provat prokuroria dhe ekspertëtë e saj. Pra, duhet të shkojë në vendngjarje prokuroria e cila duhet të bëjë hetimin e objektit me ekspertë, inxhinerë për të marrë të gjithë aktet e konstruktimit, nga vjetërisa nga deformimi i tij objektet e reja nga moszbatimi i kushteve teknike, kushteve të ndërtimit apo lejet e dhëna me abuzim me falsifikime apo nga ana tjetër objekte të ndërtuara me më shumë kate sesa është dhënë leja, të ndërtuara në vende ku nuk duhet të ndërtohej.

Të deformuara gjatë ndërtimit apo si në rastin e Durrësit ku u tha se një pallati i ishte hequr një mur betoni apo kolonë për tu hapur salla, pa folur këtu për dhjetëra pallate të tjera të cilat janë bërë të pabanueshem.

Ndërkohë inxhinierët e kanë bërë të qartë që nuk është faji i tokës por faji i kokës sepse ata sjellin si argument që shumë pallate rreth 80% e tyre kanë rezistuar, por ata janë ndërtuar sipas kritereve dhe standardeve por janë shembur objekete për të cilat nuk janë zbatuar rregullat e ndërtimit, Nuk janë zbatuar parametrat nga zbatuesit apo edhe projektuesit.

Ajo që duhet të ndodhë është një dhe vetëm një, asnjë objekt i cili rrezikon shembjen nuk duhet prishur veç në rastet e një emergjence por edhe në këtë rast duhet të thirren prokurorët dhe ekspertët, të mbledhin provat dhe pastaj të bëhet shembja.

Duke shembur këto objekte që janë në emergjencë për tu shembur sepse mund te rrezikojnë jetën e banorëve, të cilët shkojnë dhe hyjnë brenda duke rrezikuar kokën e tyre, mund te zhduken provat.
Ku do i gjejë prokuroria provat në rast se objekti shembet dhe bëhet hi?
Asnjë objekt nuk duhet të shkatërrohet derisa ekspertët të mbledhin provat së bashku me prokurorinë.
Është koha që përgjegjësit të japin llogari para ligjit dhe prokuroria të bëjë punë e saj megjithëse kjo e fundit është duke fjetur gjumë, edhe psë sot ata duhet të ishin në terren dhe të kishin mbledhur provat pas tragjedisë së 26 nëntorit./CNA.al