Gjashtë ditë nga tërmeti katastrofik/ Prokuroria ende “në gjumë”

1 Dhjetor 2019, 12:47, Politikë CNA

Gjashtë ditë pas tërmetit të datës 26 nëntor ku pasojat ishin katastrofike, prokuroria nuk ka hedhur ende asnjë hap. Janë 51 viktima qindra godina të pabanueshme, dhjetëra të tjera të shembura, shumë objekte të reja të coptuara të, dërmuara nga tërmeti, janë disa qindra të plagosur dhe disa mijëra të pastrehë.

Një bilanc katastrofash nga një tërmet 6,4 ballë pasuar nga qindra lëkundje të tjera që nuk po ndalen, megjithëse sipas sizimiologëve gjithçka është normale dhe situata po shkon drejt qetësimit.
Nuk ka vend për panik, por ka vend për drejtësi, sërish është radha e saj të thotë fjalën, por institucioni kryesor i cili duhet të merret me hetimin, investigimin dhe mbledhjen e provave të plota për këtë situatë, po fle gjumë.

Arta Marku dhe prokuroria e Durrësit nuk po bëjnë asgjë tjetër, kanë ikur me pushime. Prokurorët kanë rrëmbyer paratë nëpër çanta dhe veturat apo avionet rrugëvë të Europës apo në vende të tjera të sigurta ku mendojnë se tërmeti nuk i ndjek nga pas.

Ndërkohë, prokuroria, ekspertët e thirrur prej saj duhet të ishin në çdo objekt në çdo godinë në çdo qytetar duke mbledhur prova dhe fakte, duke mbledhur lejet e ndërtimit, duke mbledhur projektet fillestare, projektet e zbatimit dhe konstatimin si provë se çfarë kishte ndodhur dhe duke dalë në një përfundim nga ekpertiza se kush ishin shkaqet e shëmbjes së disa objekteve qofshin këto hotele apo pallate.

Me prokurorinë kjo gjë nuk po ndodh dhe pritet të ndodhë nesër, një javë pasi ka ndodhur tërmeti.
Ndërkohë INUK dhe qeveria po shembin godina në një shkelje të hapur ligjore, megjithëse ato mund te jenë risk për banorët, ato duhen rrethuar e ata nuk duhen lejuar të hyjnë brenda, ndërsa ndërtesat të qendrojnë aty si provë, si fakt për prokuorinë sepse në të kundërt nuk ndodh asgjë tjetër, thjesht dhe vetëm zhdukin provat.

Por, si gjithmonë prokuroria, pas kësaj reforme në drejtësi ka një tjetër hall.
Arta Marku mesa duket ka hallin e kokës dhe vendit të saj më shumë sesa hallin për të gjetur përgjegjësit e katastrofës që shkaktoi tërmeti i 26 nëntorit. Përgjegjës që fillojnë në administratë, tek biznesi apo ndërtues kushdo qofshin ata, të gjithë duhet të përgjigjen para ligjit.

Ata që nuk morën masat pas 21 shtatorit, ata që nuk zbatuan ligjet kur ndërtuan këto objekte, të gjithë duhët të japin llogarti për këtë katastrofë që ka tronditur çdo shqiptar sot./CNA.al