E fundit!

21:40 Denoncim

Një vit pritje për 3 milionë borxh, çfarë ndodhi pas ndërhyrjes së “Stop”

Rasti i radhës i transmetuar në emisionin “Stop”, këtë të ...

Skenaret e mundshme për qeverinë e re të Kosovës/ Parashikime për pas 6 tetorit

6 Tetor 2019, 20:28, Kosova & Bota CNA

Të dielën në darkë vonë, ose më së largu të hënën me 7 tetor, do dihet kush dhe sa ka fituar në zgjedhjet e jashtëzakonshme në Kosovë. Albin Kurti nga Vetevendosja dhe Vjosa Osmani e Lidhjes Demokratike të ish Presidentit historik, Rugova, – do skicojnë ndaras se si do duket qeverisja e ardhshme. Kjo llogari do varet jo vetem nga rezultatet e partive te tyre.

Varianti i parë:

Vetëvendosja dhe Albin Kurti, fitojnë më shumë vota edhe partia edhe lideri, por jo shumicën e nevojshme për të bërë qeverinë. Nëse LDK do jetë partia e dytë, do jetë e natyrshme një ftesë drejt tyre, por duke u ofruar postin e kryeparlamentarit, që indirekt Vjosa Osmani në një paraqitje gjatë fushatës e ka refuzuar.
Në një skenar të tillë, LDK mund të përfshihet në një situata ku Vjosa Osmani me grupin e saj të “të rinjëve” do pranojë të rrijë në opozitë, rreth dy vite sa pritet të zgjasë mandati i kësaj qeverie, dhe gjatë kësaj kohe do marrë komplet kontrollin e partisë duke larguar “xhaketat e vjetra” tip Lutfi Haziri, Agim Veliu, Isa Mustafa (te cilët konsiderohen ende përgjegjës për kthimin e LDK nga Partia me e madhe shpesh në patericë të PDK dhe interesave të Hashim Thaqit. Ky variant, në fakt nuk do tu pëlqejë shumë ndërkombëtarëve që tërheqin fijet e zhvillimeve, sikudo në Ballkan edhe në Prishtinë.
Në një skenar të tillë, Albin Kurti do detyrohet të perfshijë në qeveri fraksionin e PDK-se (Nisma e Fatmir Limajt), cilëndo parti të serbve që fiton ose të gjithë përfaqësuesit e komuniteteve pakice) dhe ndoshta edhe Aleancën e Ramush Haradinajt, edhe pse brenda saj në koalicion ndodhet edhe fraksioni i Dardan Molliqajt, dikur ndër njerzit kryesorë të Vetëvendosjes, tashmë nën logon e “socialdemkratëve”, plus që edhe Kurti edhe Haradinaj, edhe pse dikur të afërt, tani haptas nuk e durojnë njëri-tjetrin. Versioni më i keq akoma do ishte nëse Vetëvendosje do shikonte mundësinë për koalicion me PDK e Thaqi/Veseli. Albin Kurti i trembet shumë këtij skenari që ndoshta do ta detyrojë të vihet përballë një zgjedhje të vështirë: Të tërhiqet në opozitë përsëri për të ruajtur staturën e liderit që nuk pranon kompromis me ata që i ka quajtur “kancer” për Kosovën, dhe tja lërë mundësinë e formimit të qeverisë Vjosa Osmanit, dhe ta bindë këtë të fundit që të bëhet zv/kreministre dhe ministre e jashtme në një koalicion të përbashkët, ose në emër të një kompromisi të madh, t’ja lëshojë Osmanit pozitën e kryeministres e vetë të mbajë postin e zv/kryeministrit dhe ministrit të jashtëm. Cila do jetë zgjedhja dhe a do ta pranojë këtë partia e tij?

Varianti i dytë

Vetëvendosja fiton më pak vota se LDK si parti, por Albin Kurti fiton më shumë si lider. Në këtë rast, mund të kemi një koalicion më të shpejtë mes LDK dhe Vetëvendosjes, në rast se Kurti nuk këmbëngul që të jetë kryeministër dhe bind Vjosën për një plan qeveritar antikorrupsion. Mbetet rreziku që brenda LDK-së të ketë presion jo për mospërfshirjen e Vetëvendosjes në qeveri, por për bashkëngjitjen eventuale edhe të Nisma/AKR dhe ndoshta edhe të AAK/PSD, cka do ta bënte qeverinë nga njëra anë komode me numrat e nevojshëm për miratim ligjesh e marrëveshjesh të dhimbshme qe priten, por edhe pothuajse pa opozitë, pasiqë PDK e Veseli/Thaqit do ta ketë të vështirë të bëjë opozitë, ose të paktën nuk do merret seriozisht një kohë të gjatë nga askush.

Varianti i trete

LDK fiton me shumë vota si parti dhe Vjosa Osmani si lidere poashtu. Në rast se Vetëvendosje nuk bie dakord që të hyjë në qeveri, sipas kushteve të LDK, Osmani mund të përfshijë në planet e veta Nisma/AKR (në rast se keta e kalojnë pragun) dhe AAK/PSD duke e vënë sidoqoftë vetën menjëherë nën akuzën se po bën qeveri me një pjesë të mirë të qeverisë së vjetër. Do duhet të presim edhe se si do dalin në “bastionet” e ashtuquajtura “të vetat” liderët e vjetër të LDK-së, të cilët votën për partinë prej kohësh kanë zakon ta perkthejnë si meritë personale dhe jo si paaftësi të partive “të luftës” për tu gjendur në ato zona. Nuk është për tu habitur nëse pas refuzimit eventual të Vetëvendosjes për tu pajtuar me kushtet e LDK-së, të ashtuquajturit “njerëzit e Hashimit” brenda kësaj partie, të kërkojnë përfshirjen në koalicion të PDK-së. Kjo mund të sjellë edhe deri te ndarja e LDK-së në fraksione.

Variante plus

Nëse LDK fiton më pak vota si parti por Vjosa fiton më shumë si person, do të varet nga Albin Kurti se cilat pjesë nga skenari i parë do i zbatojë. Ose mund të bëjë diversion duke i premtuar LDK-së postin e presidentit pasi do ti kenë votat për ta derguar Hashim Thaqin në shtëpi (ndoshta më me dëshirë në burg, por për këtë basti tani është i hershëm dhe i rrezikshëm).

Nuk besoj se do ketë ndonjë variant ku LDK ose Vetëvendosje në pamundësi të merren vesh për koalicion paszgjedhor, do të dhurojnë postin e kryeministrit për Ramushin ose Kadri Veselin (hipotetikisht edhe për Fatmir Limajn, edhe pse ky i fundit në fushatë ka thënë se nuk do ta pranonte nëse nuk ka votat si parti e parë)

Ka pasur gjatë tërë fushatës një përpjekje nga Partia Demokratike e Kosovës dhe segmente afër saj që ta paraqesin atë si rivale për vendin e dytë ose edhe për të parin, por në një rast të tillë (që nuk e besoj) as Vetëvendosje e as LDK nuk do të preferonin të hynin në kombinime me të. Cilado që e bën do dalë më e humbur nëzgjedhjet e ardhshme, kurdo që ato të mbahen, e që pritet të jenë jo më larg se pranvera e 2022. Të parakohëshme, sigurisht nëse në qeverinë që del prej 6 tetorit, përfshihet me cfarëdo menyre Partia Demokratike e Kosovës.