E fundit!

17:50 Kronika

Morën ryshfet nga shoferi/ AMP arreston në flagrancë 2 punonjës policie

Agjencia e Mbikëqyrjes Policore ka arrestuar në flagrancë ...

Tetori nis i përgjakur/ Bilanc lufte në vendin tonë, tetë persona të vdekur mbi dhjetë të plagosur

5 Tetor 2019, 08:53, Kronika CNA

Vrasjet dhe aksidentet vijojnë të mbeten një kambanë alarmi në vendin tonë.

Fillimi i tetorit, ka shënuar një bilanc lufte, ku tetë persona kanë humbur jetën në vetëm katër ditët e para të këtij muaji, ndërsa mbi dhjetë persona të tjerë kanë marrë lendime nga aksidentet rrugore.

Të hënën e 1 tetorit, një vrasje mafioze tronditi Lushnjën. Një person u ekzekutua me breshëri kallashnikovi, ndërsa po pinte i vetëm kafen e mëngjesit.

Viktima është Besmir Hida, tregtar makinash, është daja i Zamir Latifit, të riut që u vra aksidentalisht në 11 tetor të vitit 2017 në Lushnje, teksa shënjestër ishte Xhulio Shkurti, nipi i Aldo Bares.

Besmir Hida është gjetur i shtrirë në tokë, në katin e dytë të lokalit, ndërkohë që dëshmitarët kanë parë autorët me maska të largohen me një makinë të vogël. Më pas e njëjta skemë e përdorur dhe më parë. ?Gjendet e djegur një makinë, dyshohet se iu përket autorëve?.

Vetëm një ditë më vonë, pasditen e 2 tetorit një krim horror ndodhi në Dibër, ku humbën jetën tre persona, anëtarë të një familje.

Pas një konflikti, njëri nga vëllezërit Sali Dakuçi, ezkekutoi vëllanë Kujtim Dakuçi, nipin e tij Flogert Dakuçin dhe më pas qëlloi dhe veten.

Po në datën 2 tetor një tjetër vrasje tronditi Mirditën. Një 34-vjeçar, u vra në mënyrë makabre.

Viktimë mbeti Eri Zefi, i cili sipas policisë dyshohet se është marrë peng para se të vritej dhe është ekzekutuar në Rrugën e Kombit. Më pas, trupi i tij është hedhur në një kanal të fshatit mirditor, ku u gjet nga banorët e zonës.

Pista e parë që prin hetimet është ajo e hakmarrjes, pasi vëllai i viktimës, Ndue Zefi, ka vrarë mëngjesin e 24 shkurtit në qytetin e Durrësit, fqinjin e tij, Martin Ndrecën, pasi ky i fundit i kishte ofenduar familjarët.

Mbrëmjen e dy tetorit, një tjetër jetë ka humbur. Një 42-vjeçare me inicialet S.H, i ka dhënë fund jetës duke u hedhur nga kati i 5-të i një pallati në Tiranë.

Por, jo vetëm vrasje. Edhe aksidentet vijojnë të mbeten një ndër shkaktarët kryesorë të humbjes së jetës në vendin tonë.

Pasditen e dy tetorit, një aksident i rëndë ka ndodhur në Kodër-Kamëz.

Si pasojë e aksidentit mësohet se ka mbetur i plagosur rëndë drejtuesi i automjetit.

Mëngjesin e tre tetorit, një aksident i rëndë me pasojë vdekjen e një personi dhe plagosjen e dy të tjerëve ka ndodhur në aksin rrugor Librazhd-Qafë Thanë.

Mësohet se një automjet trajler ka goditur një autobus, dhe për pasojë ka humbur jetën 82-vjeçarja me inicialet R.H.

Gjithashtu nga aksidenti kanë mbetur të plagosura edhe dy shtetase të tjera.

Po në datën tre tetor, një aksident ka ndodhur në afërsi të Rinasit, ku mbetën të plagosur tre persona.

Mëngjesin e djeshëm, data 4 tetor, një 19 vjeçar humbi jetën si pasojë e një aksidenti në autostradën Vorë-Tiranë.

Dy automjete janë përplasur dhe për pasojë ka ndërruar jetë 19-vjeçar me inicialet K.H., i cili ishte pasagjer në një nga mjetet e përfshira në aksident, ndërsa mbeti i plagosur njëri nga drejtuesit e mjeteve.

Po në katër tetor, një aksident ndodhi në Lezhë, ku u raportua se mbetën të plagosur katër persona, ndërsa një tjetër aksiden me pasojë plagosjen e një personi ndodhi në Shkodër./ CNA.al