Sherr në Asamblenë e PS-së për emrin e kryebashkiakut të Urës Vajgurore

5 Maj 2019, 19:07, Aktualitet CNA

Mbledhja e antarëve socialist të Urës-Vajgurori, është shoqëruar me debate të ashpra.

Anëtarët e Asamblesë, nuk kanë qënë dakort me kandidaturën e kryetares aktuale, Juljana Memaj, të përkrahur nga Blendi Klosi.

Asambleja e Partisë Socialiste të Urës-Vajgurore ka propozuar 2 emra të tjerë kandidatësh për Bashkinë, përkatësisht Fatli Afilaj, aktualisht kryetar i këshillit të qarkut Berat, dhe Isuf Baze, inspektor në DAR Berat.

Por, pak përpara se të fillonte mbledhja, që u shoqërua me debate të ashpra, u nxorrën jashtë nga salla të gjithë anëtarët e Partisë Socialiste që nuk ishin antarë të Asamblesë, mes të cilëve edhe ish kryetari i PS-së në Poshnje, Ramadan Baho.

Pas përfundimit të mbledhjes në një nga lokalet e qytetit të Urës-Vajgurore, 2 punonjës të Bashkisë kanë kërcënuar dhe goditur Ramadan Bahon, duke e bërë atë përgjegjës për konfliktin në mbledhjen e Asamblesë. Pasi e kanë goditur, dy punonjësit e Bashkisë së Urës-Vajgurore: Muharrem Selenica, me detyrë punonjës i shërbimit pyjor dhe Berti Memaj, shofer në Bashki, njëkohësisht dhe xhaxhai i kryetares aktuale të Bashkisë, janë larguar nga lokali, shkruan “Ballkanweb”.

Ramadani ka bërë denoncim në Komisariatin e Policisë së Urës-Vajgurore për rrahjen dhe, sipas burimeve policore, të dy shtetasit e sipërpërmendur janë shoqëruar në polici, ku po deklarojnë në lidhje me rrethanat e kësaj ngjarjeje të rendë.

Ish-kryetari i Partisë Socialiste të fshatit Poshnje në Urë-Vajgurore,Ramadan Baho, pasi ka deklaruar se ka qënë për 26-vite me radhë kryetar, foli edhe për rrjedhën që morën debatet mes socialistëve në mbledhjen e Asamblesë. Ai deklaroi se socialistët e Urës-Vajgurore kanë qënë kundër propozimit të Klosit për emrin e kryetares aktuale të Bashkisë ndaj kanë protestuar për këtë kandidaturë gjatë mbledhjes, ku edhe kanë propozuar emra të tjerë kandidatësh për të qenë garues në zgjedhjet e pritëshme të 30 Qershorit.

Ramadan Baho pohoi se anëtarët e PS-së në Urë-Vajgurore, kanë një unitet mes tyre dhe të gjithë bashkë kanë kundërshtuar kandidaturën e Juljana Memaj, për një mandat të dytë në drejtimin e Bashkisë së Urës-Vajgurore./CNA.al