"Peshkon" pronat në bregdet/ Kryegjyqtari Pashk Gjaci jep llogari në Vetting

18 Mars 2019, 16:35, Aktualitet CNA

Kryetari i Gjykatës së Përmetit, Pashk Gjaci, do të përballet nesër me Vettingun.

Trupa gjykuese e Komisionit të Pavarur të Kualifikimit, që do të kalojë në sitë Gjacin përbëhet nga treshja Olsi Komici, Roland Ilia dhe Valbona Sanxhaktari.

Gjaci është bërë i njohur për opinionin publik në vitin 2012, kohë kur emisioni “Fiks Fare”, denoncoi se Gjaci nuk lejonte pronarët e ligjshëm që të gëzonin tokën në bregdet.

I veshur me pushtetin që i jepte detyra, ai kërcënonte se do t?u merrte pronën disa qytetarëve, të cilët figuronin pronarë me certifikata pronësie.

Kështu u tha në atë kohë në emisionin investigativ.

Sipas të njëjtit emision, ngjarja ka ndodhur në janar të vitit 2011, në zonën e njohur si Gryka e Lumit, në Tale të Lezhës, kur zoti Pashk Gjaci, i shoqëruar nga disa persona kishin hyrë në pronën e zotit Pjerin Gjoka.

Pas ngjarjes së ndodhur në janar të vitit 2011, pronari i tokës, z. Gjoka ka depozituar një kallëzim penal në Prokurorinë e Lezhës kundër gjyqtarit të Përmetit, Pashk Gjaci, për shkatërrim të pronës. Por në fakt, në Gjykatën e Shkallës së Parë të Lezhës nuk u gjykua gjyqtari, por babai i tij, zoti Nikollë Gjaci.

Nuk dihet se çfarë ka ndodhur me këtë çështje.

Kujtojmë se tre vite më vonë, në vitin 2015, Inspektoriati i kontrollit në Ministrinë e Drejtësisë dhe KLD konstatuan se gjyqtari Pashk Gjaci kishte zvarritur disa çështje, kryesisht penale, nga 6 muaj që është afati, deri në dy vite. Edhe fundi i kësaj çështjeje është enigmë.

Sa i përket aspektit pasuror, rezulton se Gjaci në deklaratën fillestare ka thënë se posedon dy ndërtesa të privatizuara në vitin 1995 në Fan Mirditë me sipërfaqe 21 m2 dhe 300 m2, një apartament në Laç, dy sipërfaqe toke në Laç dhe në Velipojë. Gjithashtu ai deklaron se ka 33% të një shtëpie 3-katëshe të ndërtuar nga prindërit dhe vëllai emigrant në vitin 2007 në qytetin e Laçit. Më tej ai deklaron pronësinë e dy automjeteve, kursime në cash prej 3 milionë lekësh si dhe letra me vlerë të dhuruara nga nëna.

Nga deklarimi i pasurisë Gjaci duket se preferon shumë armët. Kështu, ai ka deklaruar se ka bërë tërheqje nga llogaria për blerje arme sipas Vendimit Nr.13 dt.09.12.2016 të DPSP-së Tiranë. Gjithashtu i ka dhuruar djalit Gjenarin Gjaci para për blerje makine. Më poshtë po sjellim deklaratat pasurisë së gjyqtarit, Pashk Gjaci./CNA.al

Pashk Gjaci, deklarata e pasurise para fillimit te detyres

Pashk Gjaci, deklarata e pasurise se vitit 2010

Pashk Gjaci, deklarata e pasurise se vitit 2011

Pashk Gjaci, deklarata e pasurise se vitit 2012

Pashk Gjaci, deklarata e pasurise se vitit 2013

Pashk Gjaci, deklarata e pasurise se vitit 2014

Pashk Gjaci, deklarata e pasurise se vitit 2015

Pashk Gjaci, deklarata e pasurise se vitit 2016

Pashk Gjaci, deklarata e pasurise se vitit 2017

Blen armë dhe dhuron para/ Bëmat e një kryegjyqtari që do të “sitet” nga Vettingu