web counter
LEXO PA REKLAMA!

SHKARKO APP

App Store
Google Play

E fundit!

x

Fitoret e studentëve dhe leksioni që i dhanë politikës

7 Dhjetor 2018, 09:22, Aktualitet CNA

Prej tre ditësh studentët e universiteteve publike në vend po protestojnë për plotësimin e katër kërkesave të tyre.

Protesta fillimisht u iniciua nga studentët e Arkitekturës, e më pas ju bashkuan edhe studentët e fakulteteve të tjera, duke bërë që Ministrja Nikolla të dalë disa herë në konferencë urgjente për mediat, ku edhe pranoi tërheqjen nga VKM-ja, për tarifat shtesë për provimet e mbartura si dhe ra darkort për një grup pune për pikën e dytë.

Por, ndërkohë studentët kanë paralajmëruar se nuk tërhiqen deri në plotësimin e katër kërkesve të tyre. Ndërsa dje pati një tubim madhështor para Ministrisë së Arsimit, sot pritet që akoma më shumë student ti bashkohen protestës.

Studentë të universiteteve në rrethe, në Vlorë, Elbasan, Durrës, Shkodër apo dhe në Korçë kanë filluar grumbullimin pranë fakulteteve dhe më pas do të nisen drejt Tiranës.

Por, çfarë fituan studentët nga kjo protestë.

Së pari fituan mbështetje të madhe popullore dhe kanë mbajtur në pedestal emrin e studentit, duke kujtuar dhjetorin e vitit 1990.

Një protestë me një organizim, i cili ishte shembullor dhe që tregoi se të rinjtë janë kundër sistemit.

Së dyti, studentët, ata pak të rinj që kanë ngelur në Shqipëri dhe që nuk kanë marrë rrugët e Europës, me aktin e tyre shembullor treguan se janë qytetarë europianë që nuk e duan këtë sistem që qeveris vendin.

Së treti, studentët treguan se mund ti thyejnë turinjtë një qeverie arrogante, e cila i quajti ngelës, por për 24 orë u tërhoq, duke ndryshuar VKM-në për tarifat shtesë për provimet e mbartura. Detyruan ministren të dalë katër herë në konferenca shtypi, dhe të kërkojë negociata për të shkuar më tej zgjidhjen e problemit.

Së katërti, studentët na treguan se në Shqipër nuk ka opozitë. Ata na thanë qartë se nuk duan që nga pas ta ndjekë Partia Demokratike, LSI-ja apo parti të tjera politike, të cilat për 28 vite kanë qënë pjesë e sistemit politik në Shqipëri dhe që janë përgjegjës për ligjin e arsimit të lartë dhe pasojat që kanë studentët. Qeveria është përgjegjëse për përgatitjen e ligjit, LSI-ja se e mbështeti dhe e votoi dhe PD-ja që heshti kur u miratua ligji dhe nuk e coi kurrë në Gjykatën Kushtetuese për ta rrëzuar.

Së pesti, studentët treguan sesi i thyen turinjtë kryeministrit tonë, i cili flet me arrogancë, e cilëson veten si një njeri i suksesshëm, të cilin askush nuk e rrëzon dot pasi kështu tregojnë sondazhet e tij, por studentët treguan se mund ta rrëzojnë me një lëvizje shumë të thjeshtë.

Përtej pikave që ju dha qeveria, këto janë disa nga fitoret e studentëve. Thyen qeverinë, thyen opozitën, morën mbështetjen e opinionit publik dhe vranë frikën.

Studentët janë një leksion demokracie në Shqipëri dhe treguan sesi me parimet e tyre sesi mund të bashkohesh dhe të hedhësh në kosh të plehrave një kastë politike 28-vjeçare, e cila vetëm ka abuzuar me emrin e tyre./ CNA.al





Lajmet e fundit nga