Kërcënohet me jetë gazetari/ ”I forti” i Laçit i drejton pistoletën

3 Shtator 2018, 07:33, Aktualitet CNA

Një shpërthim me tritol ka ndodhur në lagjen nr.4 pranë një lokali në qytetin e Laçit. Shpërthimi ka ndodhur rreth orës 01:30 të mëngjesit të kësaj të hëne. Tritoli është vendosur tek hyrja e lokalit në pronësi të Llesh Burakut, 53 vjeç, banues në Laç. Nga shpërthimi i tritolit nuk raportohet për persona të lënduar, por vetëm dëme materiale, shkruan Shqiptarja.com.

Në vendin e ngjarjes shkoi edhe një ekip xhirimi i Report Tv për raportimin e asaj çfarë kishte ndodhur, por ata hasën në rezistencën e Burakut, pronar i lokalit. Fillimisht 53-vjeçari ka filmuar me telefon automjetin e gazetarit të Report Tv, Julian Shota, duke i kërcënuar se nëse transmetojnë ngjarjen në televizion do kenë punë me të. Sipas Burakut, as policia nuk do ta bëjë publike ngjarjen, shkruan Shqiptarja.com.

Si të mos mjaftonte kërcënimi i hapur, Llesh Buraku ka nxjerrë edhe një armë zjarri tip pistoletë, të cilën ia ka drejtuar gazetarit të Report Tv, Julian Shota, duke e kanosur me jetë. Në atë moment kanë ndërhyrë disa të afërm të të riut, duke i bllokuar krahun për të mos lejuar përshkallëzimin e situatës. Nën kërcënimin e armës, Buraku ka kërkuar që t’i dorëzojnë edhe telefonat.

Në vendin e ngjarjes nuk ka pasur asnjë efektiv policie, ndërsa shefi i komisariatit të Laçit, Erdit Rreçeku, i kontaktuar nga gazetarët për ngjarjen e rëndë, është përgjigjur se ndodhet me pushime. “Jam me leje. Të fala”, ka qenë përgjigjia e kreut të policisë së Kurbinit.

Llesh Buraku është një personazh i njohur për policinë. Tre vite më parë ai u arrestua pasi dhunoi një inspektor të Inspektoratit të Shëndetit Publik, gjatë inspektimit në lokalin e tij.

Njoftimi i policisë për ngjarjen:

Kurbin

Më datë 03.09.2018, rreth orës 02:00, në lagjen Nr.4 në Laç, në derën e jashtme të lokalit ” Bar-Kafe” në pronesi të shtetasit Ll.B. vjeç 53, ka shpërthyer një sasi lëndë eksplozive, ku si pasojë ka vetëm dëme materiale.

Punohet për identifikimin dhe kapjen e autorit. Materialet proçedurale u referuan Prokurorisë së Rrethit Gjyqësor Kurbin për veprën penale ” Shkatërrim prone me eksploziv” parashikuar nga neni 152 i Kodit Penal.

Ne fokus strategjia elektorale, pranimet e reja ne parti, raportim i turit te llogaridhenies, raporti per performancen e te zgjedhurve vendore.