Ish-Kryeprokurori në listën e zezë/ Si e groposi SHBA “ushtarin e Metës”

23 Korrik 2018, 14:06, Aktualitet CNA

Ish-kryeprokurori Adriatik Llalla, është i vetmi zyrtar i lartë i shtetit shqiptar, i cili është shpallur non grata nga Shtetet e Bashkuara të Amerikës.

Embargo nga SHBA, ish-kryeprokurorit, i është vënë pas akuzave të njëpasnjëshme për korrupsion dhe shkelje të Kushtetutës nga ish- ambasadori amerikan Donald Lu.

Një vit më parë, ambasadori amerikan Donald Lu hodhi akuza të drejtpërdrejta në drejtim të Adriatik Llallës.

?Po shohim njerëz të fuqishëm që po përpiqen të ruajnë kontrollin e tyre mbi gjykatën dhe prokurorët. Shembulli më i fundit për këtë është veprimi i Prokurorit të Përgjithshëm të Shqipërisë. Për më shumë se 18 muaj ai ka folur vazhdimisht dhe me zë të lartë kundër reformës në drejtësi. Në muajt nëntor dhe dhjetor prokurorët u përpoqën dhe dështuan të sekuestronin serverin e kompjuterave të ILDKPKI që është jetik për vettingun.

U hodh shorti për anëtarët e Këshilli të Emërimeve në Drejtësi një prej institucioneve të reja që mbron pavarësinë e gjyqësorit. Shorti u drejtua siç duhet nga sekretari i përgjithshëm i kuvendit, por Prokurori i Përgjithshëm dhunoi frymën e Kushtetutës duke dërguar një listë me 3 prokurorë për të plotësuar 3 pozicione?, ka deklaruar Lu, një vit më parë.

Kujtojmë se pas akuzave nga ambasadori Lu, Ilir Meta, që në atë kohë, pra në vitin 2017 ishte kreu i Kuvendit, është vënë në mbrojtje të Prokurorit të Përgjithshëm.

Meta tha, se pasi i kishte kërkuar në mënyrë zyrtare llogari institucionit të Prokurorisë së Përgjithshme dhe pasi lexoi përgjigjet e kthyera në ky institucion, për shortin e përzgjedhjes së anëtarëve të Këshillit të Emërimeve në Drejtësi është zbatuar ligji.

?Prokuroria ka zbatuar ligjin që ka hartuar Kuvendi?, deklaroi Meta.

Por, sërish telashet për Llallën nuk mbaruar, diplomacia amerikane nuk hoqi dorë nga akuzat ndaj tij.

Kujtojmë se pas emërimit të Prokurores së Përgjithshme të përkohshme Arta Marku, Adriatik Llalla, me 11 shkurt 2018 dha dorëheqjen nga sistemi i drejtësisë duke mos pranuar që të qëndronte prokuror i thjeshtë, shkruan CNA.al.

Menjëherë pas këtij lajmi, ka reaguar ambasadori amerikan, Donald Lu.

?Vendimi për t?u tërhequr është një vendim personal, por largimi i çdo gjykatësi apo prokurori të korruptuar apo të paaftë është një fitore në betejën për një sistem drejtësie më të mirë. Ata nuk mund të rikthehen në sistem për 15 vjet.

Vendimi për t?u tërhequr nuk i shfajëson këta ish zyrtarë nga përgjegjësitë e mundshme penale për korrupsion apo shpërdorim detyre. Ata që kanë frikë nga vetingu duhet të kenë frikë edhe nga hetimet e pashmangshme penale.? ka shkruar Lu në rrjetet sociale, duke berë kështu thirrje indirect për hetimin e tij.

Ndërsa katër ditë më vonë, me 15 shkurt 2018, Departamenti i Shtetit i ndaloi hyrjen në Shtetet e Bashkuara ish Prokurorit të Përgjithshëm të Shqipërisë Adriatik Llalla.

Në vendim thuhet, se Sekretari i Shtetit Rex Tillerson, e miratoi masën e ndalimit për shkak të përfshirjes së ish zyrtarit shqiptar në raste të mëdha korrupsioni.

Ligjet amerikane parashikojnë që në rastet kur ka informacione të besueshme se zyrtarë të huaj përfshihen në raste madhore korrupsioni, ose në shkelje të rënda të të drejtave të njeriut, këtyre individëve dhe familjes së tyre të afërt, u ndalohet hyrja në Shtetet e Bashkuara. Ligji po ashtu parashikon që Sekretari i Shtetit ka të drejtë që sanksionet ndaj këtyre individëve dhe familjeve të tyre, t’i miratojë privatisht ose publikisht.

Përveç zotit Llalla, Sekretari Tillerson ka miratur ndalimin e hyrjes në Amerikë edhe të bashkëshortes së tij Ardjana Llalla, të vajzës Eni Llalla dhe një fëmije tjetër të tij, që nuk ka shtetësinë amerikane.

Pas largimit, nga drejtësia, pas ndalimit për hyrje në SHBA, Llalla është vënë nën hetim, fillimisht nga Prokuroria e Durrësit dhe më pas nga Krimet e Rënda, e cila sot i ka sekuestruar edhe pasurinë/CNA.al