Dështimi i zgjedhjeve në PD/ Bashës i grisin urdhërin

14 Korrik 2018, 12:55, Aktualitet CNA

Në Partinë Demokratike gjithçka duket në kaos, ky i shkaktuar nga kreu i saj Lulzim Basha.

CNA.al ka raportuar ditë pas dite për urdhërin nr 25, i datës 11 maj 2018 të Lulzim Bashës, i cili deri në fund të qershorit orientonte degët se duhet të përfundonin proçesin e riorganizimit. Megjithëse për herë të parë në PD ishte i pa njohur pasi si zakonisht në proçese riorganizimi apo organizative jepen udhëzime, Basha nxori një urdhër. Një urdhër i cili në fakt dështoi. Zgjedhjet nuk u bënë, pra në 98% të Shqipërisë nuk u zhvillua riorganizimi në bazë, por dhe aty ku janë bërë ato kanë pasur probleme dhe janë bërë në kundërshtim me statutin dhe vetë urdhërin e Lulzim Bashës.

Për shembull janë disa degë të cilat e kanë përfunduar riorganizimin në bazë, si nëndega numër 5 dhe 2 në Tiranë, por edhe degët e Fierit, të Lushnjës dhe të Gjirokastrës, të cilat raportojnë tek sektori i organizimit në Partinë Demokratike se kanë përfunduar zgjedhjet e tyre në seksione dhe në grup seksione ashtu siç orientonte urdhëri i Bashës i 11 majit.

Por në fakt edhe këtu ku janë zhvilluar zgjedhjet sërish ka probleme, pra një çorganizim i organizuar. Urdhëri në njërin krah nuk zbatohet, por dhe atëherë kur zbatohet, zbatohet keq apo shumë keq, por shkelet dhe vete statuti dhe vetë urdhëri i Lulzim Bashës.

Sipas të dhënave të konfirmuara edhe nga degët e PD, por dhe nga sektori i organizimit në Partinë Demokratike, riorganizimi i zhvilluar në 5 degë që raportohet se kanë përfunduar proçesin e zgjedhjeve në bazë është bërë totalisht në shkelje të statutit, pasi janë shkelur pikat e urdhërit të Lulzim Bashës, kryetarit të Partisë Demokratike, të cilat flasin për grupet e punës. Pra grupet dhe nëngrupet e punës, që duheshin ngritur nga qendra, pra me përfaqësues të emëruar nga Lulzim Basha, pas ngritjes së këtyre grupeve në mbledhje të kryesive të degëve formoheshin nëngrupet e kështu me rradhë.

Pra një proçes organizimi që shkonte nga lart poshtë me disa grupe pune të cilat do të ishin përgjegjës për zgjedhjet. Në fakt në të gjitha degët si në Fier, Gjirokastër, Lushnje, në degën 2 dhe 5 zgjedhjet janë zhvilluar në shkelje të statutit. Nuk ka pasur grupe pune, pra në degët e Lulzim Bashës edhe atëhere kur zhvillohen zgjedhjet në zbatim të një urdhëri, shkelet vetë urdhëri, pikat e tij por dhe statuti i Partisë Demokratike, ç’ka tregon se gjithçka duket të jetë në kaos, një i bie gozhdës e tjetri patkoit. Edhe kur duan të venë vetullat, ata nxjerrin sytë./CNA.al