Vëllai i Fatmir Xhafajt si Elvis Roshi

16 Maj 2018, 09:50, Aktualitet CNA

Agron Xhafaj, vëllai i Ministrit të Brendshëm Fatmir Xhafaj ka njoftuar sot se do të paraqitet pranë autoriteteve italiane për të ekzekutuar një vendim-dënimi penal, që është ndërmarrë më herët kundrejt tij.

Xhafaj ka pranuar që ka qenë në burg për drogë, por të gjithë këtë histori e ka klasifikuar si një gabim të bërë në moshën e rinisë.

?Unë kam gabuar në rininë time. Si jo pak të tjerë. Aspak dhe për asnjë arsye nuk e justifikoj dhe nuk e përligj atë gabim. Edhe pse cilido që ka patur mundësinë të shohë atë dosje penale dhe ka parë rrethanat e kryerjes së asaj vepre penale, e kupton shumë mirë shkallën e përfshirjes dhë rolin tim në atë histori?, ka sqaruar Agron Xhafaj.

Të njëjtin version, se është një gabim rinie i ka qëndruar më herët edhe ministri i brendshëm Fatmir Xhafaj.

Siç duket në Partinë Socialiste, krimet mbulohen me justifikimin e moshës së re apo rrethanat në të cilat ka ndodhur ngjarja.

I njëjti refren është përsëritur më herët dhe në rastin e ish-kryebashkiakut të Kavajës Elvis Roshi.

I vetmi dallim mes Roshit dhe Xhafajt, është vepra penale të cilat kanë kryer.

Agron Xhafaj është dënuar për trafikim të lëndëve narkotike ndërsa Elvis Roshi për përdhunim. Që të dy i kanë kryer këto vepra penale në shtetin italian.

Rikujtojmë se kryeministri Edi Rama e ka shfajësuar para shkarkimit Roshin, duke thënë se ai ka qenë i detyruar nga rrethanat në moshën e rinisë.

?Duke i njohur dhe respektuar gjithnjë vështirësitë që të rinjtë shqiptarë, kanë kaluar përmes dallgëve të larta të jetesës emigracionit, kam besuar dhe besoj se historia e Elvisit, apo Ervinit, ka qenë thjesht njëra ndër historitë e panumërta të djemve që janë përplasur nëpër ato dallgë, duke jetuar mes ëndrrës për t?ia dalë dhe makthit të rikthimit mbrapsht?, ka thënë më herët Rama.

Në dëshminë e penalitetit të lëshuar nga Ministria italiane e Drejtësisë dhe të publikuar më herët nga mediat, sqarohej se Roshi ka qenë i dënuar nga Gjykata e Campobasos për minorenët, për dy krime të kryera më 18 korrik të vitit 1992, kur ai ishte në moshën 16-vjeçare. /CNA.al