“Ramën e kanë marrë peng PPP”/ Ahmetaj sulmon Bashën: E lexon raportin e FMN si analfabet

21 Mars 2018, 15:13, Politikë CNA

Pas deklaratës së kreut të Partisë Demokratike, Lulzim Basha lidhur me raportin e FMN për situatën ekonomike në Shqipëri, ka reaguar ministri i Financave, Arben Ahmetaj.

Në një postim në rrjetet sociale, Ahmetaj ka sulmuar Bashën duke thënë se jo vetëm nuk di tabelën e shumzimit, por ishte në një analfabetizëm të theksuar teksa ka lexuar raportin e FMN-së.

Ahmetaj pohoi se raporti i FMN është shumë serioz, ndërsa aty sipas tij janë të qarta arritjet e padiskutueshme dhe sfidat e pamohueshme të ekonomisë së Shqipërisë.

Kujtojmë këtu se orë më parë kreu i PD-së, Lulzim Basha e cilësoi raportin e FMN-së një kambanë alarmi për ekonominë shqiptare.

Basha theksoi se Rama ishte marrë peng nga PPP-të, nuk janë gjë tjetër veçse forma të pastrimit të parave.

Reagimi i plotë i ministrit Ahmetaj:
Që Lulzim Basha nuk e njeh mjaftueshëm as tabelën e shumëzimit, ky është fakt botërisht i njohur! Që Lulzim Basha ngatërrohet edhe kur flet për paratë e partisë së tij, këtë e tregoi më së miri numri i shpjegimeve kontradiktore që dha publikisht për financimet ruse të fushatës së tij kundër Shqipërisë nëpër botë!

Po që Kryetari i Opozitës ta lexojë publikisht raportin e FMN-së, si një analfabet që nuk ndjek dot as fillin e abetares, kjo shkon përtej Lulzimit si simbol paaftësie individuale e budallallëku politik dhe rëndon qenësisht vetë institucionin e opozitës! Dhe ky është tanimë një problem i madh shoqëror, jo thjesht një boshllëk i madh politik në shoqëri.

Raporti i FMN është shumë serioz për një qenie kaq jo-serioze sa c?është opozita sot. Në raport janë të qarta arritjet e padiskutueshme dhe sfidat e pamohueshme të ekonomisë së Shqipërisë sot, e cila rritet në mënyrë të qendrueshme dhe nuk ka lidhje as me fjalën ?krizë? e as me fjalë të tjera të përdorura rëndom në fletërrufetë e përditshme të Partisë Demokratike e të kryetarit të saj.

Ngushëllime të sinqerta asaj partie, prej të cilës nuk kemi pritur ndonjë gjë të madhe, por që na befason përditë me brockullat e mëdha që prodhon për një konsum publik gjithnjë e më në rënie! /CNA.al