Në PD ka vend për të gjithë

5 Mars 2018, 11:20, Aktualitet CNA

Ditët e fundit në opinionin publik është rikthyer fort diskutimi për një ndarje të mundshme të Partisë Demokratike, pasi të paktën dy rryma kritikësh të kryetarit të saj Lulzim Basha, prej muajsh shpresojnë në një reflektim të këtij të fundit, i cili në fakt nuk ka bërë asgjë, por thjesht përpiqet të shpëtojë me retorikë politike.

Në ballë ka nxjerrë Tritan Shehun. Nuk ka asnjë diskutim se në PD ka vend për të gjithë. Edhe pse Tritan Shehu në moshë pensioni, rikthehet deputet atëherë kur nuk i duhet askujt.

Në PD ka vend për të gjithë pas asnjë diskutim, se kur bëhet deputet djali qesharak i Fahri Balliut, nuk ka asnjë arsye që të tjerët të jenë xhelozë, çdo i paaftë mund të shpresojë.

Pse të mos e bashkojë PD-në Ervin Salianji me mesazhet e tij perverse, i cili sulmoi me urdhër të Bashës elitën e PD-së disa herë publikisht?

Si nuk ka vend në Partinë Demokratike, kur u rikthye në elitë Vali Duka, e zhdukur nga PD-ja për më shumë se 20 vite.

Çfarë mund ta pengojë bashkimin, kur në grupin e PD-së “shkëlqen” dhe jep mendimin Genc Pollo, i cili në fakt nuk ka ?ikur? asnjë ditë nga PD-ja?

A mund të mos bashkohen demokratët rreth Gridës?

Si mund të mos bashkohet PD-ja me Romeo Gurakuqin dhe deputetë të tjerë që vijnë nga UET i Çilit?

A mund të ketë ndarje me Edmond Spahon në krye të grupit parlamentar? 27 vite në karrige, deputet, sekretar, kryetar komisioni, nënkryetar partie. Në moshë pensioni, i quajturi ?kërmilli? i PD-së, mund ta udhëheqë proçesin e bashkimit, dhe mund ta drejtojë ekipin, bashkë me këta të mësipërmit.

Kush ka dyshime se PD nuk bashkohet, kur Lulzim Basha ju vjedh votat demokratëve, e panë të gjithë me 22 korrik?

Pse nuk mund të bashkohet PD-ja, kur Luli shet mandate deputetësh me qindra-mijëra euro?

Një PD më të bashkuar, Lulzim Basha mund ta shiste më shtrenjtë te Edi Rama.

A mund të qëndrojë e përçare PD-ja kur ka deputet Astrit Veliaj, Agron Shehaj, etj?

Në një grup parlamentar me 43 vetë, ku spikasin disa deputetë që numërohen me gishtat e dorës, të tjerët nuk vlejnë as për kusur, jo më për politikë. Si mund të mos bashkohet PD-ja, me këtë grup parlamentar që shkëlqen me elitën dhe sekretariatin që mblodhi Basha rreth tij?