web counter
LEXO PA REKLAMA!

SHKARKO APP

App Store
Google Play

E fundit!

x

Studentët e Mjekësisë në protestë për këshillat studentorë/ Kërcënojnë me grevë urie

26 Shkurt 2018, 15:38, Aktualitet CNA

Një grup studentësh të Fakultetit të Mjekësisë, organizuan sot një protestë përpara ambienteve të godinës së lëndëve paraklinike. Protesta sipas studentëve, konteston me manipulimin që sipas tyre po i bëhet zgjedhjeve për këshillat studentorë. Ata shprehen se çdo komision i ngritur deri tani (që duhet e do garantojë votën e çdo studenti) ka ardhur si pasojë e veprimeve jo transparente, në mungesë të plotë të informacionit dhe në shkelje të ligjit dhe rregullores së zgjedhjeve për këshillat studentorë, të miratuar nga Senati Akademik me vendimin nr.68,datë 21.12.2017.

Studentët janë të vendosur dhe shprehen të sigurt se nëse nuk merret një përgjigje dhe zgjidhje konkrete, do shkohet drejt grevës së urisë. Këmbëngulja e tyre do vazhdojë deri në garantimin e një procesi dinjitoz dhe në përputhje të plotë me çdo pikë të rregullores së zgjedhjeve për këshillat studentorë. Janë pikërisht këta studentë të cilët falë iniciativës së tyre dhe një “lufte” prej më shumë se dy vitesh dhe protestash të njëpasnjëshme, më në fund arritën të vendosnin institucionin që i përfaqëson përpara përgjegjësisë së hartimit dhe miratimit të një rregulloreje zgjedhjesh për këshillat studentorë.

Prej të paktën 7 vitesh këto këshilla përfaqësohen nga të njëjtët individë, që nuk janë zgjedhur me votë, e ushtrojnë këtë detyrë jashtë çdo kriteri ligjor, kanë mbaruar studimet dhe shfrytëzojnë këtë këshillë për interesa personale fitimprurëse(konferenca, ekskursione, ballo) duke keqpërdorur kapital ekonomik dhe fonde të këshillave që duhet të vendoseshin në dispozicion vetëm për interesin dhe mbarëvajtjen studentore.

Për sa i përket zgjedhjeve studentore, që për Fakultetin e Mjekësisë janë me 21 Mars, ata thanë se qëllimi i vetëm pas gjithë këtyre tentativave të paligjshme në prag gare studentore është tjetërsimi i vullnetit studentor. Për ata që investohen vetëm për këto makinacione, nuk ka rëndësi si votohet, rëndësi ka si numërohet. Dhe çfarë ka ndodhur deri tani nuk ka çfarë prodhon veçse manipulim.

Studentët janë të palëkundur në bindjen e tyre për të bërë çmos për garantimin e një gare transparente që do i vlejë dinjitetit të të gjithëve, do shprehë vullnetin e të gjithëve dhe do i japë asaj hapësirë studentore një shpresë, ku çdokush mund të besojë në të bukurën dhe fisniken e asaj që ëndërron e do të realizojë.

Në fund të protestës studentët dolën me një peticion drejtuar rektoratit të UMT dekanit të FM dhe Ministrisë së Arsimit ku u kërkua:

1)Shkrirja e plotë KZIS (komisioni zgjedhor institucional studentor

2)Monitorimin nga ministria dhe institucioni arsimor të të gjithë procesit zgjedhor. Në rast të mosplotësimit të këtyre kërkesave studentët kërcënojnë me përshkallëzim të situatës. /CNA.al





Lajmet e fundit nga