Privatizimi i CEZ/ Ruli: I suksesshëm, procesi i hapur është politik

13 Shkurt 2018, 20:34, Politikë CNA

Ish-ministri i Ekonomisë, Tregtisë dhe Energjitikës, gjatë qeverisjes së ish-kryeministrit Sali Berisha, Genc Ruli, është i ftuar në emisionin “Studio e hapur”, ku foli lidhur me hetimet që po bën Prokuroria për privatizimin e CEZ, si dhe dëshminë e tij të dhënë në Prokurori para disa ditësh.

Sipas Rulit, procesi në fjalë është i iniciuar politikisht dhe se privatizimi i CEZ ka qenë një sukses dhe është cilësuar i tillë edhe nga tre institucionet që kanë shoqëruar këtë proces.

“Në parimin e drejtësisë që bëhet nuk më lejohet të flas detaje më tepër. Por mund të them se i përmbahem argumentit tim në lidhej me këtë çështje. Nëse ka një çështje CEZ që çohet në formë akuze, duhet të kemi parasysh kronikën , nuk është një reagim i partisë Socialiste që për faktin se konstaton gabime bën detyrën dhe denoncon rastin. Por KLSH e cilëson këtë një dëm të madh financiar, apo edhe se nuk janë mbrojtur interesat e shtetit. Por ata e rritën borxhin shumë herë më shumë, me pretendimin se trashëguan borxhe. KLSH pas hetimin ngre këtë akuzë, pas disa ditësh ke një kundërgoditje, ku Ministria e Industrisë dhe Energjetikës akuzon se privatizimi i CEZ ka qenë i keq, jo mbyllja. Të dyja çështjet u kaluan nga Prokuroria në Gjykatën e Lartë, e cila për secilin rast mori vendimin që për të dyja rastet nuk shihte vepra penale. Pastaj ka një rihapje që bëhet, për të hetuar si u mbyll marrëveshja, Komisioni Spaho, dhe më pas ngrihet një tjetër çështje për CEZ, nga Komisioni Balla. Dhe u kërkua të hetohen disa persona, unë nuk isha në listën e këtyre personave, por Prokuroria për historikun e gjithë kësaj historie e pa të arsyeshme që unë të jepja dëshminë time. Pretendohet se privatizimi i CEZ u bë nën influenca favorizuese nga disa ndërmjetës. Por historia është krejt ndryshe. Privatizimi i CEZ është tepër i suksesshëm i cilësuar i tillë edhe nga tre institucionet që nga shoqëruar gjatë gjithë procesit.”, – thekson Ruli.

Më tej ai u ndal tek dëshmia e tij, ku tha se nuk ka asgjë të re në dëshminë e tij të dhënë disa ditë më parë, ndërsa e cilësoi procesin si të iniciuar politikisht. /CNA.al