Shkarkimet dhe emërimet në Ministrinë e Drejtësisë?/A do ta mbrojë Fatmir Xhafaj në Prokurori, ministren Etilda Gjonaj?

3 Shkurt 2018, 12:16, Aktualitet CNA

Fatmir Xhafaj, zyrtarisht është Ministër i Brendshëm, por praktikisht ai është edhe Ministër i Drejtësisë dhe jo vetëm.

Nga zyra e Ministrisë së Brendshme, Xhafaj ka marrë në dorë edhe fatin e Ministrisë së Drejtësisë, duke emëruar, shkarkuar dhe duke marrë vendime të rëndësishme që lidhen me këtë dikaster. Xhafaj çdo ditë merr vendime, të tipit shkarkime, emërime, apo edhe esktradime, në emër të Ministrinë e Drejtësisë.

Ndërkaq Ministrja e Drejtësisë, nëse mund ta quajmë ende të tillë, Etilda Gjonaj po shton në portofolin e karrierës së saj, shkeljet e njëpasnjëshme të ligjit.

Nuk dihet nëse Xhafaj i ka premtuar Gjonajt se do t?i dalë garant në rast se ajo përfundon në Prokurori, por nga një inspektim i kryer në MD, vërtetohet se emërimet në këtë institucion janë bërë me bekimin e kreut të Ministrisë së Brendshme.

Sipas raportit të dalë nga inspektimet, emërimet në Ministrinë e Drejtësisë, janë bërë sipas lidhjeve shoqërore, miqësore, klanore dhe partiake.

Lidhur me ndryshimet në stafin e Ministrisë së Drejtësisë sigurisht këtu me bekimin e Fatmir Xhafës, ka ndryshuar struktura e Ministrisë dhe me pretekstin e ndryshimit të emërtimeve, janë shkarkuar nga detyra 10 punonjës të stafit.

Megjithëse në ministri ka vende vakante, ministrja Etilda Gjonaj, në kundërshtim me ligjin dhe në kufijtë e shpërdorimit të detyrës është e gatshme të paguaj dëmshpërblime për punonjësit e pasistemuar nga lekët e taksapaguesve shqiptarë në shumën mbi 100 milion lekë, vetëm e vetëm që këta persona të mos jenë më pjesë e Ministrisë së Drejtësisë.

?Shkarkimet nga detyra përveçse në kundërshtim me ligjin janë kryer edhe me porosi politike?, saktësohet më tej në raport.

Ministrja Gjonaj, përveç se po bën emërime, shkarkime apo edhe ekstradime siç është rasti i Nezar Seitaj, rrezikon të përfundojë në organin e akuzës.

Në këto rrethana, shtrohet pyetja se a do ta mbrojë Fatmir Xhafaj në Prokurori ministren Etilda Gjonaj, meqë po vendos në emër të saj, nga zyrat e Ministrisë së Brendshme?

CNA (CityNews Albania), pak ditë më parë raportoi se si Xhafaj mban post të trefishtë. Përveçse punon njëherësh në dy ministri, ai merr vendime edhe në emër të Prokurorisë së Përgjithshme.

Rikujtojmë se superministri Fatmir Xhafaj, menjëherë pas emërimit e thërriti Kryeprokuroren Marku në zyrën e tij, në lidhje shkarkimet dhe emërimet në organin e akuzës.

E njëjta situatë mund të përsëritet, por këtë radhë me një tjetër kërkesë që prokuroria të mos prekë ministren Etilda Gjonaj./CNA.al