web counter
LEXO PA REKLAMA!

SHKARKO APP

App Store
Google Play

E fundit!

x

SUPERBIG-ministri që drejton dy ministri dhe një institucion të pavarur

30 Janar 2018, 11:17, Aktualitet CNA

Ministri i Brendshëm, Fatmir Xhafaj po kthehet në një ?SUPERBIG? ministër, më i madhi i të mëdhenjëve, se super ministrin e ka kaluar me kohë.

Ai nuk ka nën kontroll vetëm ministrinë e tij dhe institucionet në varësi, por në qarqet mediatike dhe jo vetëm, në qeveri dhe deputetë, e dinë se ai ka nën kontroll edhe një tjetër ministri dhe prokurorin e përgjithshëm.

Gjithçka fillon tek ministrja e Drejtësisë, ku Etilda Gjonaj është emëruar prej tij, por nuk mbyllet thjeshtë me emërimin e saj si ministre dhe zgjedhjen e saj nga kryeministri.

Fatmir Xhafaj punon njëkohësisht për dy ministri. Çdo ditë komandon, emërimet, shkarkimet dhe politikat që zhvillohen në ministrinë e Drejtësisë, të cilën ai e ka drejtuar në vitet 2004-2005. Ndoshta nuk i ndahet shpirti nga ai institucion ku u akuzua për afera korruptive dhe skandale që ende nuk janë harruar.

Koha ikën mosha shkon, por Xhafaj nuk harron. Ministër i Drejtësisë, sot është Fatmir Xhafaj, ministrja është thjeshtë protokolluesja e tij apo le ta lëmë disa gradë më lart, shefja e kabinetit të Fatmir Xhafës, që qëndron në Ministrinë e Drejtësisë.

Kemi dëgjuar dhe parë sesi bashkohen dy ministri dhe drejtohen nga një ministër. P.sh, ministria e Ekonomisë dhe  Financave, ministria e Energjitikës dhe Infrastrukturës, ndoshta do të ishte e udhës që kryeministri ta bashkonte Ministrinë e Brendshme me atë të Drejtësisë, kështu do të ulte shpenzimet qeveritare dhe do të kishte edhe SUPERBIG  ministrin e qeverisë.

Një tjetër institucion që kontrollohet nga Fatmir Xhafaj është prokurori i Përgjithshëm. Arta Marku është një produkt i Fatmir Xhafaj me konsensusin e Lulzim Bashës. Që drejton një institucion të pavarur dhe nuk ka asnjë varësi nga qeveria. Çuditërisht pak javë më parë, kryeprokurorja e tregoi se qëndron në atë pozicion si punonjëse e Xhafës. Ajo i shkoi në zyrë ministrit, në një mbledhje edhe me ministra të tjerë, a thua se ishte shefja tjetër e kabinetit të Fatmir Xhafës, por që qëndronte në Prokurorinë e Përgjithshme.

Marku në atë rast ishte një zyrtare që jo pa qëllim ngatërroi pozicionin e saj. Ajo mund të qëndrojë dhe të shkojë në takim me Ministrin por kurrsesi si vartëse e tij.

Ndoshta do të duhet edhe një ndryshim i Kushtetutës dhe Ministrisë së Drejtësisë dhe të Brendshme të bashkuar nga Rama më vonë ti shtohet edhe Prokurori i Përgjithshëm. Dikur e ka pasur në nivel zv.ministri ashtu siç ka qënë edhe drejtori i Përgjithshëm i Policisë së Shtetit.

Fatmir Xhafaj sot nuk është një superministër, por është disa herë më i fuqishëm. Është më i madhi nga të gjithë ministrat. Është ministri që ka nën kontroll dy ministri, por edhe një institucion të pavarur siç është Prokuroria e Përgjithshme.

Gjithçka në shërbim të tij apo në shërbim të kryeministrit, apo është ky i fundit që e ka toleruar Xhafajn të kthehet në ?superbig? ministrin e skandaleve të mëdha dje dhe sot, korrupsionit të madh, paaftësisë së madhe, dështimit të madh, dhe pasojave që vinë shpejt atëherë kur do të kapësh gjithçka dhe të futësh nën kontroll çdo pushtet./ CNA.al





Lajmet e fundit nga