Institucionet e drejtësisë në Elbasan, si “Baste-Live”

2 Nëntor 2017, 14:50, Aktualitet CNA

Nga Artur AJAZI

Qytetarët akuza dhe indinjatë për zbatuesit e ligjit

Në rrugën që dredhon nga Drejtoria e Policisë drejt godinës së Gjykatës dhe Prokurorisë në Elbasan, nuk është më shumë se 100 metra gjatësi, dhe do të shikosh se në dy krahët e saj janë 2-3 pika legale ?Baste-Live? dhe kafene. Por askush nuk e mendon dhe e beson se atje çdo ditë takohen hallexhinj dhe sekserë, (jo për baste sportive) që bëjnë biseda dhe vendosin ?fatin? e proceseve gjyqsore mes palëve. Shpesh tek afrohesh tek ajo rrugë, ku ndodhen institucionet e drejtësisë në Elbasan, do të konstatosh se, gjysma e punës, apo fitorja apo humbja e palëve, vendoset tek lokalet karshi atyre godinave. Fakti është se ka vite që sistemi drejtësisë e ka marrë tatëpjetën dhe njollën e zezë.

Edhe në Elbasan, sistemi gjyqësor, dhe organi akuzës mbeten të akuzuar për korrupsion, dhe kjo më së shumti rëndon çdo ditë xhepat dhe jetën e qytetareve elbasanas, të hallexhinjve, të atyre që sorrollaten zyrave duke shpresuar se do të marrin drejtësi. Çdo ditë para godinave të drejtësisë presin me dhjetra e dhjetra qytetare, të cilët halli i sjell në dyert e saj, për pronën, apo çështje të tjera penale dhe civile, dhe tek i pyet të thonë ?do ta fitoj gjyqin, i dhashë avokatit sa më kërkoi për ta fituar çështjen?. Dhe natyrisht po qe se, nuk jepen paratë, gjyqin e humb dhe vërdallisesh në Apel, ku edhe atje është një tmerr pa fund. Po deri kur me këtë sistem të kalbur dhe të korruptuar drejtësie.

Ditët e fundit, një gjyqtar në Elbasan, u bë objekt akuzash nga një familje autoktone qytetare, e cila e akuzonte se kishte bërë procesin gjyqsor dhe kishte marrë vendimin e njëanshëm pa qenë fare dëshmitarja ,e cila kishte vite që kishte vdekur, madje në Durrës, atje ku ishte martuar para 60 vitesh. Shpesh abuzimi me detyrën dhe korrupsioni kanë qenë objekt i medias, i KLD, por deri sot nuk ka realisht një të penalizuar qoftë nga Prokuroria apo edhe Gjykata.

Statistikat zyrtare flasin se të paktën për Elbasanin, kemi 6 gjyqtarë të denoncuar dhe 3 prokurorë, ku gjysma e tyre e kanë mbyllur dosjen, kurse 2 janë akoma në proçesh gjykimi me vërejtje me paralajmërim nga KLD. Elbasani veçohet si qyteti ku vërshojnë lumë denoncimet drejt KLD-së dhe Presidencës. E kthyer në ?traditë? bërja e drejtësisë në rrugë e lokale, mbetet eksperienca më negative që ka asfiksuar dhe denigruar shumë keq sistemin e drejtësisë.

Por realiteti nuk mund të shtrëmbërohet, por duhet thënë siç është, pasi ndryshe nuk ndryshon asgjë për mirë. Ka shumë qytetarë elbasanas që torturohen me vite në e zyrat për hallet dhe problemet me drejtësinë, duke paguar gjoba tek sekserët e avokatët, duke shpresuar drejtësi dhe vendime të bazuara në ligj, duke zbrazur xhepat dhe shkatërruar jetën e tyre. Edhe sikur ta konsiderosh demagogji gjithçka thuhet, mjafton të lexosh deklaratën e pasurisë gjyqtarëve, dhe prokurorëve dhe të kuptosh realitetin. Qytetarët e Elbasanit tashmë e kanë humbur edhe besimin tek ndëshkimi ligjor ndaj korrupsionit, duke përjetuar çdo ditë realitetin e dhimbshëm që rëndon mbi xhepat dhe familjet e tyre./ CityNews