Analiza /Çfarë po ndodh mes Bashës dhe Berishës?

26 Shtator 2017, 20:13, Aktualitet CNA

Çfarë po ndodh mes Bashës dhe Berishës? Shumëkush ka filluar ta shtrojë këtë pyetje edhe më më forcë, pas intervistës së fundit të liderit historik të PD-së dhe disa kundërreagimeve që ka bërë vetë Basha. Sapo Berisha tha se i takon pasardhësit të tij të korrigjojë gabimin që bëri me listat, duke gjetur mënyrën si të afrojë figurat e PD-së që mbetën jashtë, Basha i tregoi atyre derën dhe nuk u la të hapur as mundësinë e fraksionit. Kur Berisha i quajti këshilltarët e tij mizerabël, Basha tha se nuk i komentonte këto në një studio serioze si e Eni Vasilit.

Kur Berisha fshikulloi Dumën dhe Salianjin, Basha nuk reagoi kur ata e trajtuan doktorin thjesht si koleg.

Po t?i shtojmë këtyre episodeve qëndrimet e njerëzve që njihen si pro-berishianë (një nga kritikët kryesorë të kryetarit është Jamarbër Malltezi, dhëndëri i Berishës) duket sikur mes doktorit dhe pasardhësit të tij, ka një ftohje të madhe.

Megjithatë në korridoret e PD-së dhe në grupimet e ndryshme të saj ka disa versione për fatin e kësaj marrëdhënieje, që do të jetë përcaktuese për të ardhmen e PD-së. Lapsi.al i ka analizuar të gjitha.

1)Basha po kërkon të bëjë një shkëputje të butë nga Berisha

Ka një hipotezë se Basha ka një strategji të kalkuluar mirë, që kur hartoi listat e demokratëve, pa e pyetur ish shefin e tij. Ai i preu Berishës krahët dhe e zhveshi nga e gjithë historia e PD-së, aq sa shumë demokratë nuk e shihnin dot më liderin e tyre në atë listë deputetësh, të përbërë nga ?kalamaj?.

Por nëse e gjithë kjo lëvizje u bë për të forcuar pozitën e Bashës në parti, të pavarësuar nga paraardhësi, atëhere si shpjegohet që Berisha e mbështeti marrëveshjen e 18 majit me Ramën? Si shpjegohet që ai nuk artikuloi asnjë kritikë deri një javë më parë? Këto pikëpyetje intriguese shtrojnë dilema të tjera?.

2)Basha po vepron me lejen e Berishës

Një nga shpjegimet është se Basha po vepron me lejen e Berishës. Se në PD po vazhdon linja e nisur me 2013, kur Berisha bëri gjithçka për t’i spastruar rrugën atij që ka vendosur që në krye të herës si pasardhës. Ajo u pa qartë edhe në intervistën e fundit të ish kryeministrit, i cili me gjithë vërejtjet për listat, me gjithë ?këshilltarët mizerabël?, me gjithë evidentimin e gafave të fushatës, e rikonfirmoi Bashën si lider, bëri thirrje që kritikët të bashkoheshin rreth tij, dhe nuk mbështeti asnjë nga dyshimet e bëra publike mbi mënyrën se si ai ndenji në krye të PD dhe sesi organizoi një garë fallco?

3)Berisha është i pafuqishëm ndaj Bashës

Të gjithë elementët e përmendur më lart të bëjnë të mendosh se Basha, po e bën gjithçka me bekimin e doktorit. Por në PD ka njerëz që mendojnë se kjo nuk është e saktë, dhe mbështetjen e liderit historik e shohin si një mbështetje nga halli. Sipas tyre Berisha nuk po e shet publikisht Bashën, se ai i druhet një beteje me të. Jo më kot ai tha: ?Betejat e mia në PD kanë mbaruar?. Sipas tyre ai është i zhgënjyer dhe i mërzitur, por i pafuqishëm për të pohuar se pasardhësi, tek i cili investoi gjithçka rezultoi një dështim. Prandaj Berisha e mbështet Bashën nga halli.

Gjithësesi, cilido nga këto versione të jetë më pranë së vërtetës, një gjë po vihet re përditë e më shumë. Raporti mes Bashës dhe Berishës ka ndryshuar ndjeshëm në favor të të parit. Intervistat dhe përgjigjet e fundit po tregojnë se Luli ka filluar të ecë në rrugën e vet. (lapsi.al)