web counter
LEXO PA REKLAMA!

SHKARKO APP

App Store
Google Play

E fundit!

x

Lulzim Basha vulos fatin e zgjedhjeve në PD

17 Korrik 2017, 12:02, Aktualitet CNA

Partia Demokratike po zhvillon ditët e fundit të fushatës elektorale brenda partisë për zgjedhjen e kreut të ri. Një garë mes Lulzim Bashës dhe Eduard Selamit, e cila duket tepër false dhe e padrejtë.

Kreu i vetëngrirë i PD, Lulzim Basha, hyri në garë menjëherë pas zgjedhjeve të 25 qershorit, ku i dha partisë rezultatin më katastrofik në historinë e kësaj force politike, me 200 mijë vota më pak nga 2013.

Ai e zhyti partinë e dytë më të madhe në vend në një labirinth pa udhëkryq dhe nuk u ndal për asnjë çast të reflektojë dhe të analizojë punën e tij, por nisi betejën për të mbajtur me çdo kusht frenat e PD edhe për katër vitet e ardhshme. Teksa të gjithë demokratët ishin të shokuar nga humbja dramatike dhe kërkonin me të drejtë një analizë të këtij rezultati, Lulzim Basha vijoi rrugën pa i dëgjuar, duke u futur në një garë farsë me qëllimin e vetëm për të mbajtur karrigen e selisë blu.

Ai duhet të jepte dorëheqjen dhe të analizonte punën e tij 4-vjeçare, për të zbuluar shkaqet e humbjes dhe shkatërrimit të PD, por nuk bëri asnjërën nga këto, duke humbur mbështetjen e figurave kryesore dhe me peshë në parti.

Si një njeri që vuan për pushtet, Basha është braktisur pothuajse nga gjithë demokratët e vërtetë, ku shumica e degëve janë ngritur me peticioni, por edhe protesta, kundër tij. I rrethuar vetëm nga sorosianët, çeta e Henri Çilit, servilët dhe familjarët e tij, Basha po tenton me të gjitha mënyrat të mbajë çelësat e PD, duke zhgënjyer e përçarë deri në ekstrem demokratët.

Gara e tij është e pabesueshme, teksa ai përjashtoi kundërshtarët dhe rivalët e fortë nga frika e humbjes. Por duket se Lulzim Basha është i tmerruar dhe i frikësuar edhe nga kandidati i vetëm që e rivalizon, Eduard Selami. Ky i fundit është nxjerrë nga vetë Basha në një garë false dhe të pavlerë për PD dhe demokratët.

Skandaleve të tij, të një lideri të paaftë, që shkatërroi PD me humbjen e tmerrshme, nuk dha dorëheqjen dhe minimalja nuk pranoi të bëjë analizë, të mbledhë bazën dhe strukturat e partisë për të kuptuar ku çalon puna, iu është shtuar së fundi një tjetër skandal.

Basha ka fshehur listën e anëtarësisë së Partisë Demokratike, të cilët do të votojnë më 22 korrik. Lista e tij klandestine nuk është bërë e ditur as për kundërshtarin e tij në garë, Selamin. Kjo tregon hapur manipulimin që po iu bën Basha këtyre zgjedhjeve, ku dhe rezultati është i pritshëm.

Kreu i vetëngrirë injoron në mënyrë të paprecedentë dhe shkel me të dyja këmbët statutin e PD dhe kjo tashmë jo për të parën herë.

Lulzim Basha do të mbahet mend si njeriu që jo vetëm shkatërroi PD, por që nuk respektoi në asnjë moment statutin, vlerat dhe logon e partisë. Njeriu i parë që i dha partisë humbjen katastrofike dhe në vend që largohej kokëulur rikandidoi për mandatin e dytë, i vetmi lider politik që nuk bën publike listat e votuesve të PD. Njeriu i përçarjes dhe jo i bashkimit. Njeriu i çorganizimit, që shkatëroi bazën dhe degët e PD. Njeriu që nuk i interesojnë demokratët dhe PD, por karrigia dhe pushteti./CityNews





Lajmet e fundit nga